JOHN I 5 - Thuhun Thah (BSI)

Ginna: khovel zohna

¹ Mi koipouh Jesu chu Khrist ahi chih gingta chu Pathian a piang ahi; huleh koipouh a hingtu lungsiat inchu a hin zong a lungsiat veu hi.

² Hikhu in Pathian tate i lungsiat uh chih i he, Pathian i lungsiat a, a thupiahte i juih chiangin.

³ Bang jiahin ahiai i chih leh, Pathian i lungsiatna u’chu a thupiahte i juih uh ahi; huleh a thupiahte chu a khauh sih hi.

⁴ Pathian a piang photmahin khovel a zou hi; huleh hikhu ahi khovel tunga gualzohna chu, i ginna ngei uh.

⁵ Jesu Pathian Tapa ahi chih gingta mi chauh loungal koi ahiai khovel tunga gualzou?

⁶ Hi ahi tui leh sisana hung chu, Jesu Khrist ngei; tui chauh a hilou in, tui leh sisanin ahi zaw. Huleh heetpihtu chu Hagau ahi, Hagau chu thutah ahih jiahin.

⁷ Ajiahchu vaan ah heetpihtu thum a um hi, Pa, Thu, huleh Hagau Siangthou; huleh hi thumte chu khat ahi.

⁸ Huleh leitung ah heetpihtu thum a um hi, Hagau, tui, huleh sisan; hi thumte chu khat in a kituaah uhi.

⁹ Mihing heetpihna bawn i pom inchu, Pathian heetpihna a loupizaw hi; ajiahchu a Tapa tungthu a, a heetsah Pathian heetpihna chu hikhu ahi,

¹⁰ Koipouh Pathian Tapa gingta in amah ah heetpihtu a nei hi; Pathian gingta lou mi’n chu amah mi zuau ahisah hi; Pathian in a Tapa ahung piah thu a heetsah a gintaat louh jiahin.

¹¹ Huleh heetsahna chu hikhu ahi, Pathian in kumtuang hinna ahung peta a, hu hinna chu a Tapa ah a um hi.

¹² Koipouh Tapa nei in hinna a neita, koipouh Pathian Tapa nei louin hinna a nei sih hi.

¹³ Kumtuang hinna na neita uh chih na heetna diingun, nanguh Pathian Tapa min gingtate kawmah hi thute ka gial ahi huleh Pathian Tapa min na gintaat theihna diingun.

¹⁴ Huleh amah a i kimuanna u’chu hikhu ahi, bangpouh amah deihzawng a i nget leh ahung ngaikhe veu hi, chih.

¹⁵ Huleh bangpouh i nget uh ahung ngaihkhiahsah chih i heet inchu, a kawm a i silnget uh i muta chih i he uhi.

¹⁶ Mi koipouh in a unau, sihna khop hilou sual bawl a a muh inchu a ngetsah diing a, huchi'n Ama’n sihna khop hilou sual bawlte diingin hinna a pe diing hi. Sihna khop sual a um a; hukhu diingin a ngetsah diing ka chi sih hi.

¹⁷ Dihtatlouhna zousiah sual ahi; huleh sihna khop hilou sual zong a um hi.

¹⁸ Koipouh Pathian a piang chu a sual zing sih chih i he hi; hizongleh Pathian a piangpa in amah a kikola migiloupa’n a khoihkha sih hi.

¹⁹ Eiuh chu Pathian a kuan i hi chih leh, khovel pumpi chu gilou in a um chih i he uhi.

²⁰ Huleh Pathian Tapa chu a hungta a, amah Midihtah chu i heet theihna diingin heetsiamna ahung peta chih i he uhi; huleh eihaw chu amah Midihtah, a Tapa Jesu Khrist ngei ah i um uhi. Amah chu Pathian dihtah leh kumtuang hinna ahi.

²¹ Tate haw, milem apat kihemkhia un. Amen.