JOHN I 4 - Thuhun Thah (BSI)

¹ Deihtahte, hagau taphot gingta sih unla, hagaute chu Pathian a kuan ahihleh hih louh chian zaw un; ajiahchu zawlnei tahlou tampi khovel ah a pawtdohta hi.

² Hikhuah Pathian Hagau na he diing uh: Jesu Khrist tahsa in ahung piang chih gum hagau photmah chu Pathian a kuan ahi.

³ Huleh Jesu Khrist tahsa in ahung piang chih gum lou hagau photmah chu Pathian a kuan ahi sih; hichu Khrist doudaalpa hagau hung diing ahi chih na jah uh chu ahi; tuin zong khovel aha um zouta hi.

⁴ Tate haw, nang u’chu Pathian a kuan na hi va, hute na zouta uhi; ajiahchu amah nanguh a um chu, khovel a umpa sangin a lianzaw hi.

⁵ Amah u’chu khovel a kuan ahi va, hujiahin khovel sil thute a soi uhi, huleh khovel in a thu uh a ngaikhe veu uhi.

⁶ Ei u’chu Pathian a kuan i hi a, Pathian he photin i thu a ngaikhe veu hi; Pathian a kuan hilouin i thu a ngaikhe sih hi. Hikhu ah hagau dih leh dihlou i he uhi.

Pathian lungsiatna leh mihing lungsiatna

⁷ Deihtahte, khat leh khat i kilungsiat diing uhi; ajiahchu lungsiatna Pathian a kuan ahi; huleh mi chin lungsiat siam photmah chu Pathian a piang ahi a, Pathian a he hi.

⁸ Lungsiatna nei lou mi’n Pathian a he sih; bang jiahin ahiai i chih leh Pathian chu lungsiatna ahi.

⁹ Hikhu ah Pathian in eiuh ahung lungsiatna a kilangta, amah jala i hin theihna diing a Pathian in a Tapa neihsun khovel a ahung sawl jiahin.

¹⁰ Hi-ah lungsiatna a um, eiun Pathian i lungsiat chih ahi sih a, ama’n eiuh ahung lungsiat a, i sualnate thuphatawina hi diingin a Tapa ahung sawl chih ahi zaw hi.

¹¹ Deihtahte, Pathian in hichilawma ahung lungsiat leh, eihaw zong khat leh khat i kilungsiat diing uh ahi.

¹² Mi koimah in bangchihmahin Pathian a mu ngei sih hi. Eihaw khat leh khat i kilungsiat leh Pathian eimah ah a um zing a, a lungsiatna zong eimah ah a bukim ahi.

¹³ Hikhu ah eiuh amah ah i um a, amah eiuh ah a um chih i he hi: a Hagau ahung piah taah jiahin.

¹⁴ Huleh Pain Tapa chu khovel Hundampa diingin a sawl chih i muta va, huleh i hesah uhi.

¹⁵ Mi koipouh Jesu Pathian Tapa ahi chih gum taphot chu Pathian amah ah a um, amah zong Pathian ah a um hi.

¹⁶ Huleh i tunga Pathian in lungsiatna a neih chu i he va, ging zong i gingta uhi. Pathian chu lungsiatna ahi; koipouh lungsiatna a um chu Pathian ah a um a, Pathian zong amah ah a um hi.

¹⁷ Hikhu ah i tung a lungsiatna a bukimta hi, vaihawmni chianga haangsanna i neih theihna diingin; amah um banga khovela eihaw zong i um jiahin.

¹⁸ Lungsiatna ah launa a um sih a, lungsiatna bukimin launa a delhmang zaw hi; Ajiahchu launa in thuaahgimna a nei hi. Launa neimi chu lungsiatna ah a bukim nailou ahi.

¹⁹ Ama’n eiuh ahung lungsiat masat jiahin, eiun amah i lungsiat uh ahi.

²⁰ Mi’n Pathian ka lungsiat, chi ngal a, a unau a muhdah inchu, mizuau ahi; ajiahchu a muh gegu a unau bawn lungsiat loupi’n a muh louh Pathian bangchi’n a lungsiat thei diai?

²¹ Huleh amah apat hi thupiah i nei uhi, Koipouh Pathian lungsiat in a unau zong a lungsiat diing ahi, chih.