JOHN 21 - Thuhun Thah (BSI)

Tiberi diila nungjuite kawma Jesu kilaahna

¹ Hi silte nungin Jesu chu Tiberi diil ah, a nungjuite kawmah a kilaah kiit a; hichi bangin a kilaah hi.

² Simon Peter toh, Thoma Didum a kichi toh, Galili gam a Kana khua a um Nathanael toh, Zebedi tate toh; huleh a nungjui dang nih umkhawm ahi va.

³ Simon Peter in a kawmvah, Nga man in ka chiah diing, a chi a. Amahun a kawmah, Kei u’zong na kawmah ka hung diing uh, a chi va. Huin a chiah doh va, kuang sung khatah a toupah va; hu janin bangmah a man sih uh.

⁴ Hizongleh jingkal ahung hihin Jesu chu diil pangah a ding a; ahihvangin nungjuite’n Jesu ahi chih a he sih uhi.

⁵ Huin Jesu’n a kawmvah, Naute, neeh diing bang aha na nei viai? a chi a. Amahun, Nei lou, chi'n a dawng va.

⁶ Ama’n a kawmvah, Kuang gei jiatlamah sep leh u’chin na man diing uh, a chi a. Hujiahin amahun a sep va, huchi'n nga a tam mahmah jiahin a kaidoh zouta sih uhi.

⁷ Hujiahin Jesu’n a lungsiat nungjuipa’n Peter kawmah, Lalpa ahi, a chi a. Huin Simon Peter in Lalpa ahi chih a jahin a nga mat puannaah a silh a, (guaahtanga um ahihjiahin), diil ah a tawm kheta hi.

⁸ Huleh nungjui dangte chu leena nga kai kawmin, kuang neu khat in a hung va; (ajiahchu piaugaw apat a gamla um sih va, tong ja nih diing bang giap ahi).

⁹ Huin piaugaw ahung tunun amahun suang meihol mei kichih leh, a tung a nga leh tanghou kikoih a mu va.

¹⁰ Jesu’n a kawmvah, Tu a na nga matte uh hung tawi un, a chi a.

¹¹ Simon Peter chu a chiahtou a, nga lianpipi ja leh sawmngaa leh thum a dim leen chu piaugaw ah ahung kaidoh hi. Huchi lawma tam hizongleh leen chu a keeh sih hi.

¹² Jesu’n a kawmvah, An hung ne un, a chi a. A nungjuite koimah in, Lalpa ahi chih a heet jiahun, Koi na hiai? a chi ngam sih uhi.

¹³ Huin Jesu a hung a, tanghou a la a, a kawmvah a pia a, huchibang mahin ngate zong a pia hi.

¹⁴ Hichu Jesu’n sihna apat a thohkiit nung a a nungjuite kawma a kilaah a thum veina ahi.

Jesu leh Peter kihouna

¹⁵ Huchi'n an a neeh zohun Jesu’n Simon Peter kawmah, Simon, Jona tapa, hite sangin kei na hung lungsiat zaw ei? a chi a. Ama’n a kawmah, Hi, Lalpa; ka hung lungsiat hi chih na he hi, a chi a. Ama’n a kawmah, Ka belaam noute vaah in, a chi a.

¹⁶ Ama’n a nihveina a kawmah, Simon, Jona tapa, na hung lungsiat ei? a chi a. Ama’n a kawmah, Hi, Lalpa; ka hung lungsiat hi chih na he hi, a chi a. Ama’n a kawmah, Ka belaamte vaah in, a chi a.

¹⁷ Ama’n a thumveina a kawmah, Simon Jona tapa, na hung lungsiat ei? a chi a. Ama’n a kawma a thumveina, Na hung lungsiat ei, a chih jiahin Peter chu a lungkham a. Huin ama’n a kawmah, Lalpa nangin sil zousiah na he a; ka hung lungsiat hi chih na he hi, a chi a. Jesu’n a kawmah, Ka belaamte vaah in,

¹⁸ Chihtahzetin, chihtahzetin ka hung hilh ahi, Na naupan laiin nang le nang na kawng na kigaah a, na utnalam lamah na chiah veu; hizongleh na hung upat chiangin chu na khut na jah diing a, midangin ahung gaah diing a, na ut louhna lam lamah ahung pui diing hi, a chi a.

¹⁹ Hichu ama’n bangtobang sihna in ahiai Pathian a paahtawi diing chih heetsah na diing a a soi ahi. Huleh hikhu a soi zohin ama’n a kawmah, Hung juiin, a chi a.

²⁰ Huin Peter a kinunghei in, nungjui Jesu’n a lungsiat, nitaah an neeh na a zong a awm a kingai a, Lalpa, koi ahiai nang hung mansah diing? chipa in hung juiin a mu a,

²¹ Peter in amah a muh in Jesu kawmah, Lalpa, hipa’n bang a bawl diai? a chi a.

²² Jesu’n a kawmah, Ka hung masiah um diingin deih leng nang diingin bang ahiai? Nang hung juiin, a chi a.

²³ Huin hu nungjuipa chu a si sih diing chi'n hi thu kisoi chu unaute lahah a thang vengvungta a; Jesu’n laha kawmah, A si sih diing, a chi sih a, hizongleh, Ka hung masiah um diingin deih leng nang diingin bang ahiai, a chi zaw ahi.

²⁴ Hi silte hesah leh gelh nungjui chu hipa ahi; huleh a thu heetsah chu a dih hi chih i he hi.

²⁵ Huleh Jesu’n a bawl sildang tampi zong a um a, hute gelh kimveh diing hitaleh lehkhabu kigial diingte chu khovel in zong dawllou diingin ka ngaihtuah hi. Amen.