JOHN 19 - Thuhun Thah (BSI)

¹ Hujiahin Pilat in Jesu chu a pui a, a jepta a.

² Huleh sepaihte’n linglukhuh a phan va, a khuhsah va, huleh puansandup a silhsah uh.

³ Huleh, Chibai, Judate Kumpipa! a chi va, a khut un a beeng uhi.

⁴ Pilat chu a pawt kiit a, a kawmvah, Amah ah dih louhna ka mu sih chih na heet na diingun na kawmvah ka hung puidoh hi, a chi a.

⁵ Huin Jesu chu linglukhuh khuh leh puansandup silhin ahung pawtdoh a, Pilat in a kawmvah, En un, mihing chu a chi a.

⁶ Hujiahin siampulalte leh houtute’n amah a muh tahun, Kros ah kilhbeh in, kros ah kilhbeh in, a chi va. Pilat in a kawmvah, Nangun pui unla, kros ah kilhbeh un; ajiahchu ke’n amah ah dih louhna ka mu sih hi, a chi a.

⁷ Judate’n amah a dawng va, daan khat ka nei uh, Pathian Tapa a, a kibawl jiahin ka daan dungjui un sitaah ahi, a chi va.

⁸ Pilat in hu thu a jahin a lau semta hi.

⁹ Huleh vaihawmna inn ah a luut kiit a, Jesu kawmah, Khoi a hung kuan na hiai? a chi a. Hizongleh Jesu’n a dawng sih hi.

¹⁰ Huin Pilat in a kawmah, Ka kawmah thu na soi sih maw? Kros a kilhbeh theihna leh hahkhiah theihna nei ka hi chih he lou na hiai mah? a chi a.

¹¹ Jesu’n a dawng a, Tunglam a kipana piah hi sih lechin ka tungah bangmah bawltheihna nei sih diing hi; hujiahin na kawma hung pekhepa’n sualna a lian neih zaw hi, a chi a.

¹² Hu nungsiah Pilat in hahdoh a tum a; hizongleh Judate’n, Hipa na chiahsah a ahihleh Kaisar lawm na hi sih diing; koipouh amah leh amah kumpipa a kibawl chu Kaisar dou ahi, chi'n a kikou va.

¹³ Hujiahin Pilat in hu thu a jahin Jesu ahung puidoh a, huleh vaihawmna touphah, Suanglep Hebrai haama Gabbatha kichi tungah a tou a.

¹⁴ Huleh hu ni chu chiahkaan kiginni ahi a, daah guupna vel ahi; huleh ama’n Judate kawmah, En un, na Kumpipa uh! a chi a.

¹⁵ Hizongleh amahuh chu a kikou va, Puimang in, puimang in, kros ah kilhbeh in, a chi uhi. Pilat in a kawmvah Na kumpipa uh ka kilhbeh diing maw? a chi a. Siampu lalpente’n Kaisar loungal Kumpipa dang ka nei sih uh, chi'n a dawng uhi.

Jesu kros a kilhbehna

¹⁶ Hujiahin ama’n amah chu kros a kilhbeh diingin a kawmvah a pekheta a. Amahun Jesu chu a tu va, a puita uhi.

¹⁷ Huleh amah chu a kros kipuaahin, Luguh kichi, Hebrai haama Golgotha kichi munah a chiah a;

¹⁸ Hutah ah amah chu midang nih toh kros ah a kilhbehta va, a gei geelah khat tuaah, Jesu a lai ah.

¹⁹ Huleh Pilat in lehkha khat a gial a, kros tungah a taah a, A gelh chu, Nazareth Jesu, Judate Kumpipa, chih ahi.

²⁰ Hi lehkha chu Judate tampiin a sim va; Jesu a kilhbehna uh khopi kawm naih ahihjiahin. Huleh hichu Hebrai haam leh, Grik haam leh, Latin haama kigial ahi.

²¹ Huin Judate siampulalte’n Pilat kawmah, Judate Kumpipa, chi'n gial sinla, Judate Kumpipa ka hi a chi, chi'n gial zaw in, a chi va.

²² Pilat in a dawng a, Ka gelh ka gial zouta, a chi a.

²³ Huin Jesu kros a a kilhbeh zohun sepaihte’n a puansilhte a la va, khat chiat a a tan diingun phel li a suah va, huleh a puannaah zong a la uh; a puannaah chu a khuina bei ahi a, a ngawng apat a pum a gatveh ahi.

²⁴ Hujiahin amahun, I botkeeh sih diing a, kuan tang diing aai i saan diing uh, chi'n a kihou va, Pathian lehkhathuin, Ka puansilhte a kihawm va, ka puannaah diingin aai a saan uh, chih a taangtun na diingin. Hujiahin hi silte sepaihte’n a bawl uhi.

²⁵ Huleh Jesu kros kawmah a nu leh, a nu sanggamnu, Kleopa ji Mari leh, Mari Magdalene a ding a.

²⁶ Hujiahin Jesu’n a nu leh, nungjui a lungsiatpa a kawma diing a muh in a nu kawmah, Numei, en in na tapa! a chi a.

²⁷ Huin nungjuipa kawmah, En in na nu! a chi a. Hua kipanin hu nungjuipa’n amahnu chu a inn ah a puita hi.

²⁸ Hi nungin Jesu’n sil bangkim tuin bawl zohveh ahita chih he in Pathian lehkhathu a taangtun na diingin, Ka dang a taah, a chi a.

²⁹ Hutah ah beel uain thuuh a dim khat a kitung a, spanji khat uain thuuhin a sudim va, huleh hussop chiangah a taah va, a kam ah a koihtou uhi.

³⁰ Huin Jesu’n uain thuuh a dawn zohin, Joh ahita, a chi a; huin a lu a kuun a, hagau a hahta hi.

Jesu sih nunga sil umte leh a kivuina

³¹ Huleh, Judate’n, kiginni ahihjiahin a luang te uh khawlnia kros dawna a um louh na diingin(jiahchu hu khawlni chu ni loupi ahi a). Pilat kawmah a keengte uh suhtahsah a, a luang uh laahmang diingin a ngen va.

³² Huin sepaihte a hung va, a kikilhbehpih tuah masatpen leh a khatpa a keeng a suhtansah va.

³³ Hizongleh Jesu kawm ahung phaah un ana si zouta chih ahung mu va, a keengte a sutan sih uhi.

³⁴ Hizongleh sepaihte laha khat in teipiin a naah a sun a, hutah ah sisan leh tui ahung pawtdohpah hi.

³⁵ Huleh hikhu mupa’n a heetpihta, a sil heetpih chu a dih ahi; huleh mi gintaat theihna diingun a soi dih hi chih a he hi.

³⁶ Ajiahchu Pathian lehkhathu, A guh khat zong suhtan ahi sih diing, chih a taangtun theihna diingin hi silte ahung umta ahi.

³⁷ Huleh Pathian lehkhathu dangin, Amahun a sutpa uh a en diing uh, a chi hi.

³⁸ Hi nungin Joseph, Arimathiami, Judate lau jiaha a guuh a Jesu nungjuiin Jesu luang a laah theihna diingin Pilat kawmah a va ngen a; Pilat in ana phal a. Hujiahin amah chu a hung a, Jesu luang a lata hi.

³⁹ Huleh Nikodem, a tuung a jana Jesu kawma hungpa zong a hung a, murrah leh aloe buuh sawmngaa vel ahung tawi a.

⁴⁰ Jesu luang a la va, Judate kivui ngeina bangin silgimtui toh puanmalngaat in a tuam uhi.

⁴¹ Huleh kros a a kilhbehna mun vah hu an khat a um a; hu huanah haan thah khat, koimah kivuina ngei louh a um a.

⁴² Hujiahin, Judate kiginni ahihjiahin hutah ah Jesu a sialta uh; haan chu naitah ahih jiahin.