JOHN 16 - Thuhun Thah (BSI)

¹ Hihlungkim louh a na um louh na diingun hi thute na kawmvah ka soi ahi.

² Kikhopna innahte ahung nohdoh diing va; ahi, koipouh nanguh hung thatin Pathian tunga silhoih bawl a, a kingaihtuah hun uh ahung tung diing hi,

³ Huleh hi silte na tungvah a bawl diing uh, Pa leh kei ahung heet louh jiahun.

⁴ Hizongleh ahun ahung tun chianga hute ka hung hilhta chih na heetdohna diingun hi silte nanguh ka hung hilh ahi. Na kawmva ka um jiahin hi thute a chiilin na kawmvah ka soi sih hi.

⁵ Hizongleh tuin chu ahung sawlpa kawma chiah diing ka hi a; kuamahin khoi a chiah diing na hiai? chi'n na hung dong sih uh.

⁶ Hizongleh hi thute na kawmva ka soi jiahin na lungtang uh lunggimna in a dimta hi.

⁷ Hizongleh thutah ka hung hilh hi; Ka chiahmang nanguh diingin a hoih hi; ajiahchu ka chiahmang louhleh Hamuantu na kawmvah ahung sih diing hi; ka chiah inchu na kawmvah ka hung sawl diing hi.

⁸ Amah ahung tun chiangin sual thu ahte, dihtatna thu ahte, huleh vaihawmna thu ahte khovel a siamlouh dan a hesah diing hi.

⁹ Sual thu ah siamlouh a tangsah diing, kei ahung gintaat louh jiahun.

¹⁰ Dihtatna thu ah siamlouh a tangsah diing, ka Pa kawma chiah a, na hung muh nawn louh diing jiahun.

¹¹ Vaihawmna thu ah siamlouh a tangsah diing, Hi khovel lal vaihawmsah a, a um taah jiahin.

¹² Na kawmvah thu soi diing tampi ka neia, hizongleh tuin na po zou, nai sih uh.

¹³ Hizongleh thutah Hagau ahung tun chiangin ama’n nanguh thutah zousiah ah ahung puiluut diing; ajiahchu amah phuaahthuh in thu a soi sih diing a, hizongleh a jah photmah chu a soi zaw diing; huleh sil hung tung diingte ahung musah diing hi.

¹⁴ Ama’n kei ahung paahtawi diing; ajiahchu keimaha a la diing a, nanguh ahung musah diing hi.

¹⁵ Pa sil neih zousiah keia ahi; hujiahin keimaha a la diing a, nanguh ahung musah diing, ka chi ahi.

Jesu’n a sihna diing leh a thohkiitna diing a soina

¹⁶ Tomchakhat nung chian nangun na hung mu nawn sih diing uh; huleh tomchakhat nung chian na hung mu kiit diing uh, Pa kawma ka chiah diing jiahin, a chi a.

¹⁷ Huin a nungjuite khenkhat in, Tomchakhat nungchian nangun na hung mu nawn sih diing uh, huleh tomchakhat nungchian na hung mu kiit diing uh, Pa kawma ka chiah diing jiahin, i kawma a chih bang a chihna ahiai? chi’n a kihou va.

¹⁸ Hujiahin amahun, Hi a thu soi, Tomchakhat nungchian a chih bang a chihna ahiai? a chi va.

¹⁹ Huchi'n amah a dong nuam uh chih Jesu’n a he a, a kawmvah, Tomchakhat nungchian na hung mu nawn sih diing uh, huleh tomchakhat nungchian na hung mukiit diing ah, chi a ka soi na kidongtuah uh ahi maw?

²⁰ Chihtahzetin, chihtahzetin, ka hung hilh ahi, Nanguh na kap diing va, na maau diing uh; hizongleh khovel a kipaah diing; nanguh chu na lunggim diing va, hizongleh na lunggimna uh kipaahna a suaah diing hi.

²¹ Numeiin a nauvei laiin a lunggim veu, ahun a tun taah jiahin; hizongleh nau a suaah zoh tahin hu lunggimna chu a he nawn sih, mihing khat khovel a ahung pian kipaahna jiahin.

²² Hujiahin tuin lunggimna na nei uh ahi; hizongleh nanguh ka hung mu kiit diing a, na lungtang ah a kipaah diing; huleh na kipaahna ah koima’n ahung laahsah sih diing hi.

²³ Huni chiangin nangun bangmah na hung ngen sih diing uh Chihtahzetin, chihtahzetin, ka hung hilh ahi, Ka mina Pa kawma na nget photmah uh ama’n nanguh ahung pe diing hi.

²⁴ Tutanin ka minin bangmah na ngen nai sih uh; ngen un, na mu diing ah, na kipaah uh a kimna diingin.

²⁵ Hi thute a heemin na kawmvah ka soi hi; hizongleh a heem a na kawmva thu soi nawn lou a, Pa tungtaang chiantaha ka hung heetsah diing hun tung diing ahita.

²⁶ Hu ni chiangin ka minin na hung ngen diing uh; nanguh diingin Pa ka ngen diing ka chi ahi sih hi.

²⁷ Ajiahchu nangun kei na hung lungsiat va, huleh Pa a kuana hung ka hi chih na gintaat jiahun Pa amah ngei in nanguh ahung lungsiat hi.

²⁸ Pa a kipana hungdoh a, khovel a hung ka hi, huleh khovel nusia a Pa kawma chiah kiit diing ka hi, a chi a.

²⁹ A nungjuite’n a kawmah, Ngai in, tuin chu a heemin na soi sih a, chiantahin na soita hi.

³⁰ Huleh tuin chu sil bangkim na he a, koimah in ahung dot na kiphamoh sih chih ka hechianta uh; hikhu jiahin Pathian a kipana hung pawt na hi chih ka gingta uhi, a chi va.

³¹ Jesu’n amah uh a dawng a, Tuin na gingta uh maw?

³² Ngai un, ahun ahung tung diing; ahi, tuin zong a tungta, michin na inn chiat vah na kithehdalh diing va, ka ngenin na hung nuse diing uh; ahihvangin Pa ka kawma a um jiahin ka ngen ka hi sih hi.

³³ Keimaha hamuanna na neihna diingun hi thute na kawmvah ka soi ahi. Khovel ah gimthuaahna na nei diing uh; hizongleh kipaahtahin um un, ke’n khovel ka zouta hi, a chi hi.