JOHN 12 - Thuhun Thah (BSI)

Bethani a Mari’n Jesu thau a nuhna

¹ Huleh chiahkaan gual vaah na diing ni guup ma in Jesu chu misi laha kipana a kaihthoh Lazar umna Bethani khua ahung tung a.

² Hutah ah amah diingin nitaah an a bawl a; Martha in neeh a bawl a, hizongleh Lazar chu amah toh a ankuang uumpihte laha khat ahi.

³ Huin Mari in Spiknard thau namtui man tamtah buuh kimkhat ahung tawi a, Jesu keeng a nuh a, a sam in a keengte a siaah a, huleh thau gimin inn chu a dimta hi.

⁴ Huin nungjuite laha khat, amah mansah diingpa Juda Iskariot, Simon tapa in,

⁵ Bang diing a hi thau gimtui makhai za thum a zuah a, tagahte kawma kipe lou ahiai? a chi a.

⁶ Hichu ama’n tagahte a khawhsahpih jiah hilouin, guta ahi a, dangka-ip a kol a, huleh a sunga kikoih a laah veu jiahin a soi ahi zaw hi.

⁷ Huin Jesu’n, A um um in umsah un; ka kivui ni a diingin ama’n huchu a koih ahi;

⁸ Ta gahte chu na kawmvah a um ngiitngeet uh, hizongleh kei chu na kawmvah ka um ngiitngeet sih diing; a chi a.

⁹ Hujiahin Judate tampiin amah hutah ah a um chih a heta va; Jesu jiah chauh hilouin, misi lah apat a kaihthoh Lazar zong a muhnop jiahun ahung uh.

¹⁰ Hizongleh siampulalte chu Lazar zong a thah theihna diingun a kihou va.

¹¹ Ajiahchu amah jiahin Judate tampi a paimang va, Jesu a gingta ta uhi.

Jesu Jerusalem a gualzoua a luutna

¹² A jingni’n gual vaahna a hung mi tampi in, Jesu Jerusalem ah hung diing ahi chih a jah un,

¹³ Tuum nahte a tawi va, amah lamtuah diingin a pawtdoh va, huleh, Hosanna, Lalpa mina Israelte Kumpipa hung chu a hampha hi, a chi uh.

¹⁴ Huleh Jesu’n sabiltung nou khat a mu a, a tungah a tuang a, Hichia gelh bangin,

¹⁵ Lau sin, Zion tanu; ngai in, na Kumpipa chu sabiltung nou tung a tuang in ahung hi, chih.

¹⁶ Hi silte nungjuite’n a tuungin a he sih uh; hizongleh paahtawia a um nungin hi thute amah tungtaang a kigial ahi a, huleh a tungah hi silte a bawl uh ahi chih ahung hedohta uhi.

¹⁷ Hujiahin haan apat Lazar a kouhdoh leh, misi lah apat a kaihthoh lai a, a kawma umte’n a thu a heetpih uhi.

¹⁸ Hikhu jiahin mipite’n zong hi silmah a bawl chih a jah jiahun amah ana lamtuah uh ahi.

¹⁹ Hujiahin Pharisaite a kihou va, Bangma na loh thei sih uh chih na he viai? en un, khovel in amah a juita hi, chi'n.

Grik kuate aha in Jesu muh a tupna uh

²⁰ Huleh ankuang luina a hungte lahah Grik mi kuate aha a um va.

²¹ Amah u’chu Galili gam a Bethsaida khua a um Philip kawmah a hung va, Pu, Jesu muh ka ut uh, chi’n a ngen va.

²² Philip chu a hung a, Andru a hilh a, huleh Andru leh Philipin Jesu a hilh uh.

²³ Jesu’n amah uh a dawng a, Mihing Tapa paahtawia a umna diing hun a tungta hi.

²⁴ Chihtahzetin, chihtahzetin ka hung hilh ahi, Buhtang khat lei a, a kiah a, a sih louhleh a ngenin a um zing; hizongleh a sih inchu tampiin a gah veu hi.

²⁵ Koipouh a hinna it in a taan diing a, huleh koipouh hi leitung a a hinna huain kumtuang hin dongin a humbit diing.

²⁶ Koipouhin ka nna a toh leh hung jui heh; ka umna ah ka suaahpa zong a um diing ahi; mi koipouh in ka nna a tohleh ka Pain amah a kipaahpih diing hi.

²⁷ Tuin ka lungsim a mangbang hi; huleh bang ahiai ka soi diing? Pa, Hi hun lahah hung hundamin ka chi diing adiai? hizongleh hikhu diing jiaha hi huna hung ka hi ngal a.

²⁸ Pa, na min paahtawi in, a chi a. Huin vaan apat aw ahung suaah a, Ka paahtawita a, huleh ka paahtawi kiit diing hi, chi’n.

²⁹ Hujiahin mipi a kawma ding leh hukhu jate’n vaan ging ahi, a chi va; a dangte’n lah, angel in amah a houpih ahi, a chi uh.

³⁰ Jesu’n a dawng a, Hi aw chu kei diing a hung suaah ahi sih a, nanguh diing a hung suaah ahi zaw hi.

³¹ Tu chu hi khovel vaihawm lai ahi; tuin hi khovel lal paihkhiah ahi diing hi.

³² Huleh kei lei apat a khaikaang a ka um leh mi zousiah ka kawmah ka hiip diing hi, a chi a.

³³ Hichu ama’n bangtobang sihna in ahiai a sih diing chih heetsahna a, a soi ahi.

³⁴ Mipite’n amah a dawng va, Khrist chu kumtuang in a um zing diing chih ka daan vapat ka ja uh, bang chidan a nangin, Mihing Tapa khaisanga a um ngei diing ahi, na chih ahiai? hi mihing Tapa chu koi ahiai? a chi va.

³⁵ Huin Jesu’n a kawmvah, Hun tomchakhat vaah na lahvah a um hi; vaah na neih laiun mialin ahung lap louh na diingin khohei un; ajiahchu koipouh miala khohei in khoilama pai ahih a he sih.

³⁶ Vaah na neih laiun vaah chu gingta un, vaah tate na hung hihtheihna diingun, a chi a. Hi thute Jesu’n a soi a, huin a pawta, amah vapat a kibuta hi.

³⁷ Hizongleh a ma vah silmah tampi mahmah bawl zongleh amah a gingta tuan sih uhi.

³⁸ Zawlnei Isaiah in, Lalpa, ka thusoi uh koi ahiai gingta? huleh Lalpa khut zong koi kawmah ahiai a kilat? chia a soi ahung taangtun theihna diingin.

³⁹ Hujiahin a gingta thei sih uh, ajiahchu Isaiah in,

⁴⁰ Ama’n a mit va a muh theih louh na diingun a mit uh a suhtawtsah a, huleh a lungtang va a heetsiamlouh na diingun a lungtang uh a suhkhauhsah ahi; ahung kihei kiit va, ka na suhdam louh na diingin, a chi kiit hi.

⁴¹ Hi thute chu Isaiah in a loupina a muh laia a soi ahi a, huleh a tungtaang thu a soi na ahi.

⁴² Ahihvangin vaihawmtu lamkaite lahah zong tampiin amah a gingta va, hizongleh Pharisaite jiahin amah a soiphuang ngam sih uh, huchilouin chu kikhopna inn apat nohdohin a umkha diing uhi.

⁴³ Ajiahchu amahun Pathian kipaahpiha um sangin mihingte phata um a deih zaw uhi.

⁴⁴ Jesu chu a kikou a, Koipouh kei hung gingta chu, kei hung gingta ahi sih a, ahung sawl pa gingta ahi zaw hi.

⁴⁵ Huleh koipouh kei hung mu chu ahung sawl pa mu ahi.

⁴⁶ Vaah diing a khovel a hung ka hi, koipouh ahung gingta chu miala a um zing louh na diingin.

⁴⁷ Mi koipouh in ka thusoite jain, gingta sih mah zongleh ke’n siamlouh ka tansah sih; ajiahchu khovel siamlouh tangsah diing a hung ka hi sih a, khovel hundam diing a hung ka hi zaw hi.

⁴⁸ Koipouh kei hung deihlou a, ka thusoite zong pomlouin siamlouh tangsah khat a nei hi, ka thusoite mahmahin ni tawpni chiangin amah siamlouh a tangsah diing hi.

⁴⁹ Ajiahchu keimah phuaahtawm in ka soi sih a, hizongleh Pa ahung sawlpa’n ka soi diing leh ka hilh diing thu ahung pia hi.

⁵⁰ Huleh a thupiah chu kumtuang hinna ahi chih ka he hi; hujiahin ka soi pouhmah chu Pain ka kawma a soi bangin ka soi veu ahi, a chi hi.