JAKOB 5 - Thuhun Thah (BSI)

Mihausate minuainetna demna

¹ Nanguh mihausate, tu in ngai un, na tungva hahsatna hung tung diingte jiahin kap unla, peng guaiguai un.

² Na hauhsatnate uh a segawpta a, na puante uh ngetin a ne zouta hi.

³ Na sana uleh na dangka uh a tui-eeh vehta hi; hute siatgawpna chu na sualdan uh heetsahna ahi diing a, na tahsa uh chu meikaah bangin a ne zou diing hi. Hun nununglam a diingin gou na kholta uhi.

⁴ Ngai un, na lou va buh aat a kilohte loh, amahuh heem a na piah louh uh a kikou va; huleh a aattute kikou aw chu mipite Lalpa bil ah a luutta hi.

⁵ Khovel ah nuamsatahin na um va, na kimawh zat meimei va; goh ni a bangin na lungtangte uh na thausah uhi.

⁶ Midih chu siamlouh na tangsah va, na thatta uh; huleh ama’n chu ahung doudaal sih hi.

Kuhkal diing a hasotna

⁷ Hujiahin unaute, Lalpa hung masiah in kuhkaltahin um un. Ngai un, lounei mi’n lei gah luultah chu a ngaah a, guah masa leh guah nunung a muh masiah kuhkaltahin a ngaah veu hi.

⁸ Nanguh zong kuhkaltahin um un; na lungtang uh sukip un; ajiahchu Lalpa hungna diing a naita hi.

⁹ Unaute, khat leh khat kiphunsan sih un, siamlouh tansah in na umkha diing uhi; ngai un, vaihawmtu chu kotkhaah bulah a um ahi.

¹⁰ Ka unaute, Lalpa mina thusoi zawlneite chu gimthuaahna leh kuhkalna lama etton diingin zang un.

¹¹ Ngai un, a thuaahaatte chu hampha in i sep uhi. Job kuhkaldan na ja va, Lalpa’n a tawp a, a bawldan: Lalpa chu hehpihna leh khotuahna dim ahih zong na mu uhi.

¹² Hizongleh ka unaute, sil zousiah sanga a thupipen chu kihaahsial sih un, vaan lou in aha, lei lou in aha, kichiamna dang mawngmawng in aha kihaahsial sih un; hi, na chih uh hi, hisah unla; hilou, na chih uh, hilou, hisah zaw un; huchilou in zaw siamlouh tang in na umkha diing uhi.

Haamteina silbawltheihdan

¹³ Na lahva hahsatna thuaah a um ei? haamtei heh. Kipaah a um ei? phatna la sa heh.

¹⁴ Na lahva damlou a um ei? kouhtuam upate kou henla, amahun Lalpa mina thau nuh in haamtei u’heh;

¹⁵ Huleh ginna a haamteina in damlou chu a hundam diing a, Lalpa’n amah chu a kaithou diing hi; huleh silsual ana bawl a ahihleh hute chu ngaihdamsah ahi diing hi.

¹⁶ Suhdam a na um theihna diingun, na khelhnate uh thupha kitawituah unla, khat leh khat kihaamteisah un. Midihtat guntuhtaha haamteina chu a phatuam mahmah hi.

¹⁷ Elijah chu eimah bangthou mihing ahi a, ama’n chu guah zut louhna diingin phatuamngaitahin a haamtei a; huleh kum thum leh ha guup sung leitung ah guah zu louin a umta hi.

¹⁸ Huleh a haamtei kiit a, vaanin guah a zusah a, lei in a gahte ahung suahsahta hi.

¹⁹ Unaute, na lahva mi koipouh thutah akipat na mangta henla, mi khat in pui kiitta leh;

²⁰ Amah misual a lammanna akipan kiheisahtu in sihna apat hagau khat a hundam diing a, sual tampite a khuhmang diing ahi chih kiheet heh.