HEBRAITE 8 - Thuhun Thah (BSI)

Khrist siamputna chu Aaron siamputna tunga ahi

¹ Huchi'n i thusoite laha a poimoh pen chu hikhu ahi; vaante a Tungnungpen laltouphah jiatlam a tou, huchibang siampu lal i nei ahi.

² Mihing bawl hilou a, Lalpa bawl, mun siangthou leh biahbuuh tahzet a thunatongtu chu.

³ Ajiahchu siampu lal zousiah chu silpiahte leh kithoihnate laan diing a guat ahi va; huchihjiahin hi siampu lal in zong bang ahakhat lat diing a neih a kiphamoh hi.

⁴ Leitunga ana um hile zaw, daan thu bang jel a silpiahte laantu siampute ana um jiahun, siampu in a pang hial sih diing hi.

⁵ Hute chu vaan silte etsahna leh a liima zat ahi a, Mosi’n biahbuuh bawl diing a, a kisah lai a, Pathian in a hasot bangin; ajiahchu ama’n, taang tunga etton diing a hung kimusah dungjuiin sil zousiah bawl diingin pilvaang in, a chi hi.

⁶ Hizongleh tuin chu thuchiam hoihzawte tung a siam thuhun hoihzosem palai ahih bang jelin natohna hoihzaw ana tangta hi.

⁷ Bang jiahin ahiai i chih leh hu thuhun masapen demna bei ana hitaleh, a nihna pen diing mun kingaihtuah lou diing ahi.

⁸ Ajiahchu ama’n amahuh dem in, ngai un, Israel innkuante leh Juda innkuante toh thuhun thah ka siam hun diing nite hung tung diing ahita, Lalpa’n a chi hi;

⁹ Aigupta gam a kipana a pulepate uh puidoh diing a a khut va ka tuuh ni a a kawmva ka thuhun pen bang hilou in; ajiahchu amahuh ka thuhun ah a um zing sih va, huleh ke’n amahuh ka ngaihsah sih hi, Lalpa’n a chi hi.

¹⁰ Ajiahchu hu nite nung chianga Israel innkuante kawma ka thuhun diing chu hikhu ahi, Lalpa’n a chi hi; A lungsim vah ka daan thupiahte ka koih diing a, a lungtang vah ka gial diing; huleh amahuh diingin a Pathian uh ka hi diing a, kei a diingin amahuh chu ka mite ahi diing uhi.

¹¹ Huleh amahun michinin, Lalpa he in; chih a innveengte leh, a unaute a thuhilh nawn sih diing hi; ajiahchu a neupen apat a lianpen tanin a bawnun ahung heta diing uhi.

¹² Bang jiahin ahiai i chih leh a dihtatlouhnate vah ka khotuah diing a, a sualnate uleh a bohsiatnate u’zong ka he zing nawn sih diing hi, chi'n.

¹³ Ama’n, Thuhun thah, chi a a soi jiahin, a masapen chu a luisahta hi. Huchia hung lui a, hung upa chu a mang diingkuan ahita hi.