HEBRAITE 5 - Thuhun Thah (BSI)

I siampu Lal loupi uh chu

¹ Ajiahchu siampu lal, mite laha kiladoh photmah chu, sualnate jiaha silpiahte leh kithoihnate a latkhawm theihna diingin, Pathian lam silte a mite a diinga pansah ahi uh.

² Ama’n chu bangmah heloute leh, lamkhialte tungah hehpihna a nei thei hi; ajiahchu amah ngei zong haatlouhna a tuamvelin ana umta hi.

³ Huleh hikhu jiahtahin mite a diing a a latsah bangin, sualnate jiahin amah a diing ngei zong a lat a kiphamoh hi.

⁴ Huleh hu paahtawina chu, Aaron a kouh banga Pathian in a kouh loungal, mi koimah in amah diingin a kilaah ngei sih hi.

Melkisedek umdan banga Siampu lal Khrist

⁵ Huchibang mahin Khrist zong siampu lal a siama um diingin amah leh amah a kitawisang sih hi; hizongleh a kawmah Nang chu ka Tapa na hi a, tuni’n ka hung hingkhia ahi, chi a soitu’n a tawisang ahi zaw hi.

⁶ Ama’n mun tuam khat a, Nang chu Melkisedek umdan banga kumtuang a siampu na hi, chia a soi mahbangin.

⁷ Ama’n chu tahsa a a um lai nitein, sihna laha amah huuhhing theipa kawmah naahpitaha kap leh mittui luang pum a haamteina leh ngetnate a lat nungin, Pathian laudan a siam jiahin ngaihkhiah in a um hi.

⁸ Tapa himahzongleh, a silthuaahte haw in thumandan a zilta hi;

⁹ Huleh suhbukima hung um in, a thumangte zousiah diingin kumtuang a hutdamna siamtu ahung hita hi;

¹⁰ Melkisedek umdan bang a Siampu lal, Pathian chih in a umta hi.

Khristian hinkhua a khanlet a ngaih zia

¹¹ Amah tungtaang soi diing tampi ka nei va, na ngaihkhiah peih louh jiahun a soichet zong a hahsa hi.

¹² Ahun lam ngaihtuah inchu houtute na hihtaah diing uh ahi a, Pathian thubulte khat in ahung hilh kiit ngai na hita uh; huleh angum hilou a nawitui kiphamoh bang na hung hita uhi.

¹³ Nawitui ne photmah chu naungeeh ahih jiahun, dihtatna thu ah heetna bangmah a nei sih uhi.

¹⁴ Hizongleh angum chu mi pichingte, a ngaihtuahna ah zanga, sialepha hekhen diing a a heettheihna ah sawizoita haw a diing ahi.