HEBRAITE 12 - Thuhun Thah (BSI)

Jesu ginna a etton diing pen

¹ Huchihjiahin eiuh zong heetpihtu meipi nasatah uum kiimvel a i um uh he in, ahung gihsah photmah leh, sual eimaha belh zing chu i koihkhe diing va, i ma a kitaidemna um ah kuhkaltahin i tai diing uh,

² I ginna siamtu leh subukimtu Jesu lam en in; ama’n chu a ma a um kipaahna jiahin zumnate zong poisa lou in, kros a gimna a thuaah a, Pathian laltouphah jiatlam ah a va touta hi.

³ Bang jiahin ahiai i chih leh na lungsim va na tawl va na chauh louhna diingun, amah tunga misualte nialkalhna thuaahzoupa chu ngaihtuah un.

⁴ Sual dou in sisan pawt khopin na pang nai sih uhi.

⁵ Huleh hasotna thu, tate hilh banga na kawmva kisoi chu na mangngilhta uhi, Ka ta, Lalpa sawina ngaineep sinla, a taihilha na um in zong lungke sin;

⁶ Ajiahchu Lalpa’n a lungsiatte a sawi a, huleh ta a deih photmah chu a jep veu hi.

⁷ Sawina na thuaah uleh Pathian in a tate bawl a hung bawl ahi; bang jiahin ahiai i chih leh pa sawi louh ta kua a um ngei ei?

⁸ Hizongleh ta zousiah tan ngei sawina na thuaah louh unchu, jauta na hi va, ta tah na hi sih uhi.

⁹ Hubanah zong eihaw hung sawitu tahsa a pate i nei va, huleh amahuh chu i zahtaat uhi; hu sanga hagaute Pa thuthu a i um zawh sem va, i hin diing uh hilou ahiai mah?

¹⁰ Bang jiahin ahiai i chih leh amahun ni tomtakhat diinga hoih a sah bang jel va ahung sawi uh ahi a, hizongleh ama’n chu eite phattuamna diing a, sianthouna i tan theihna diingin ahung sawi hi.

¹¹ Sawina chu a kithuah laiin kipaahhuai a bang sih a, hasiat a huai zaw hi; himahleh a nung chiangin chu huchia soihzoi a umte diingin dihtatna gah hamuan umtah a suah veu hi.

¹² Huchihjiahin khut kaikhete leh khup zoite chu phong tang un;

¹³ Huleh na keengte uh diingin lampi tang siam un, huchilou inchu keengbaite lampi apat a peetmangkha diinguh; hizongleh hute chu sudam zaw un.

¹⁴ Mi zousiah toh kituaahna leh siangthouna delh un, hu siangthouna lou inchu kuama’n Lalpa a mu sih diing hi.

¹⁵ Pilvaangtahin en un, huchilou inchu mi khattou Pathian hehpihna ching zou lou na umkha diing va; khaatna zung bang aha hung selnou in, hukhu in mi tampite suhbuah in a umkha diing uhi.

¹⁶ Khatvei neeh mana a ta upa hihna zuahpa Esau bang a kingaihhaat aha, Pathian jahlou mi aha a umkha diing hi.

¹⁷ Bang jiahin ahiai i chih leh a nunglamin vangpiahna gou chu luah tum in mit hi luang pum in phatuamngaitahin hawl mahleh kisiihna mun a muh louh jiahin deih louh in a umta chih na he uhi,

¹⁸ Ajiahchu nanguh chu taang khoihkhaah theih leh mei a kaang, vomna leh mialna leh huihpi nunna mun,

¹⁹ Huleh pengkuul ging leh thusoi gingte umna a hung na hi sih uh; hu awging jate haw in chu a kawmva hu thu a kisoi kiit nawn louhna diingin a ngen uhi.

²⁰ (Bang jiahin ahiai i chih leh sa nasanin zong hu taang chu a suhkhaah leh suang a sehlup aha, ahih louh leh tei a sutlup diing ahi chih thupiah chu amahun a thuaahzouta sih uhi.

²¹ Huleh hu a silmuh uchu a lauhuai mahmah a, Mosi’n, Ka lau naah mahmah a, ka kithing top hi, a chi hi).

²² Hizongleh nang u’chu, Zion taang leh Pathian hing khopi, vaan Jerusalem, simseeng louh angel honpi leh,

²³ Khawmpi lian leh vaan a min kigialta piang masa kouhtuam kawm a leh, mi zousiah vaihawmtu Pathian kawm leh, midihtat suhbukim a umte hagau kawmah bang,

²⁴ Huleh thuhun thah palai Jesu kawm a leh, Abel a sanga sil hoihzaw soi sisan theh kawm a hung na hi zaw uhi.

²⁵ Thusoitu chu na deih louh khaah diing uh pilvaang un. Ajiahchu leitung a thusoitu a deih louh va bawn suaahtalou ahih uleh, vaan a kipana thu hung petu i kiheisan inchu i suaahta moh sem diing uhi;

²⁶ Hulaiin a aw in lei a suliing a; hizongleh tuin chu khatvei lei chauh hilou in, vaan zong ka suliing kiit diing, chi'n thu a chiamta hi.

²⁷ Huleh hi thu, khatvei ka suliing kiit diing chih in, sil kiliingloute a um zing theihna diingin, sil kiliingte chu silsiam bang a suanmangin a um diing chih a hesah hi.

²⁸ Huchi'n gam suhliing guallouh i tan jiahun, jahtah leh, Pathian laudan siam kawma pomtaahtaha Pathian nna i toh theihna diingun hehpihna i nei diing uhi;

²⁹ Ajiahchu i Pathian u’chu kaahtum haat mei ahi.