HEBRAITE 11 - Thuhun Thah (BSI)

Ginna a mi minthangte

¹ Huleh ginna chu sil kinepnate heetchetna, sil muhlouhte um ngei a heetna ahi.

² Ajiahchu hi thu ah upate’n paahtaat a loh uhi.

³ Ginna jalin khovelte chu Pathian thu a suhtuah khawm ahi chih i he a, huchi'n sil kimute zong sil kilangte a siam ahi sih hi.

⁴ Ginna in Abel in Kaina sangin kithoihna hoihzaw Pathian kawmah a laan a, hukhu jiahin midihtat ahi chih heetsahna a loh a, Pathian in a silpiah thu ah a heetpih a; hukhu jiahin sita hinapi in thu a soi nalai hi.

⁵ Ginna in Enok chu sihna mulou diingin laahmang in a um a; huleh Pathian in a laahmang jiahin muh in a umta sih; laahmang a, a um ma in Pathian a kipaahsah hi chih heetsahna a nei hi.

⁶ Hizongleh ginna louin chu amah kipaahsah gual ahi sih hi; ajiahchu Pathian kawma hung inchu amah a um chih leh, amah guntuhtah a hawltute kawma kipaahman petu ahi chih a gintaat diing ahi.

⁷ Ginna in Noah chu sil muh nailouhte thu Pathian hilh a na um in, a lau a, a innkuanpihte hutdamna diingin kuang a bawl a; hukhuin khovel siamlouh a tangsahta a, ginna jiaha um dihtatna gouluahtu ahung hita hi.

⁸ Ginna in Abraham chu, a nung chianga gou a hung tan diing mun a chiah diing a kouh a, a um laiin a thumang a; huleh a chiahna lam diing zong he lou in a chiahdoh hi.

⁹ Ginna in gam chiamah mi gam a taam bangin ana taam zing a, thuchiam kibang a a gouluahpih diingte Isaak leh Jakob toh puaninn a teeng khawmin;

¹⁰ Ajiahchu ama’n innbul kiptah nei, Pathian sah leh bawl khopi chu a ngaah ahi.

¹¹ Ginna in Sara in zong naupaai theihna a nei a; a chiamtu chu muanhuai a, a seh jiahin a teeh nungin ta a nei hi.

¹² Huchi'n a sisa tobang mi khat apatin vaan a aahsite bang a tam leh, tui khang lian gei a piauneel banga simseeng louh ahung suaahta hi.

¹³ Hutehaw zousiah chu ginna nei in a sita va, silchiamte chu tang louin, hizongleh gamlatah apat gaalmuh in a pomkip va, leitung ah chu mikhual leh khualzin ahi uh chih ana phuangta uhi,

¹⁴ Ajiahchu hutobang thu soite’n chu gam tuam khat a hawl uh chih chiantahin a sulang uhi.

¹⁵ Huleh amahun ahung pawtna gam uh lunggulh leh u’chu, kihkiitna hun lemtaang ana muta tham diing uhi.

¹⁶ Hizongleh gam hoihzaw deih ana hi va, huchu vaan gam ahi a; hukhu jiahin Pathian chu a Pathian uh chih a kouh a zum sih hi; ajiahchu amahuh diingin khopi khat guatsa’n a koihta hi.

¹⁷ Ginna in Abraham in, ze-et a, a um in, Isaak a laan a; thuchiamte tangpa’n a tapa neihsun a laan hi.

¹⁸ Isaak ah na haahte a kichi diing, kichipa ngei chu.

¹⁹ Pathian in misi lah apatin zong a kaithou thei hi chi a geel in; hua kipanin etsahna in muh zong a mu kiitta ngei hi.

²⁰ Ginna in Isaak in sil hung tung diingte thu ah Jakob leh Esau a vangpiah hi.

²¹ Ginna in Jakob in a sih kuanin, Joseph tate geel a vangpiah a; a chiangphut dawn a kinga in Pathian a bia hi.

²² Ginna in Joseph in a sih diing kuanin Israel tate pawtkhiah diing thu a soi a; huleh a guhte tungtaang ah thu a pia hi.

²³ Ginna in, Mosi chu a pianlai in, naungeeh meel hoihtah ahi a chih jiahun, ha thum sung a nulepa phualin a um a; kumpipa thupiah zong a lau sih uhi.

²⁴ Ginna in, Mosi in ahung pichin nungin, Pharaoh tanu tapa chiha um diing a ut sih a.

²⁵ Tomchakhat sung sual nopna mun sangin, Pathian mite toh bawl gentheihna thuaah a teel zota hi;

²⁶ Khrist kimuhsitna chu Aigupta gam goute sanga hauhsatna loupizaw a ngaiin; ajiahchu a kipaahman muh diing lam chu a en zing hi.

²⁷ Ginna in ama’n kumpipa lungthahna lau louin Aigupta gam a nusia a; muhtheih louhpa chu muhtheih banga sepin a thu ah mualsuaah hi.

²⁸ Ginna jalin chiahkaan kuut leh sisan thehna a bawl hi, ta masa sulumtu in amahuh a khoihkhaah louhna diingin.

²⁹ Ginna in amahun leigaw tunga pai bangin Tuipi san a kaan va; Aigupta mite’n hubangin bawl a tum va, tui ah a tumta uhi.

³⁰ Ginna in Jeriko kulhbaang chu ni sagih a velh nungun a chimta hi.

³¹ Ginna in nohchizuahnu Rahab zong ginglou mite toh a mangthaikhawm sih hi, ama’n enkhetute hamuangtah a ana zintun jiahin.

³² Huleh bang ahiai ka soi naahlai diing? Gideon thute, Barak thute, Samson thute, Jephtha thute, David thute, Samuel thute leh zawlneite thu soi diing chileng, hunin ahung daih sih diing hi.

³³ Hute’n chu ginna in gamte a la va, dihtatna a bawlkhia va, thuchiamte a tang va, humpibahneite kam a chihsah va,

³⁴ Mei silbawltheihna a sudaai va, namsaau mahiam a peel va, haatlouhna apatin haatsah in a um va, kidouna ah a haat mahmah va, a gaalte uh pangkhawm a delhjah uhi.

³⁵ Numeite’n a misi uh thou kiit a mu va; mi dangte zong gimthuaahsah in a um va, thohkiitna hoihzaw a muhna diingun, hutkhiahna a deih sih uhi.

³⁶ Huleh mi dangte’n chu nuihzat bawlna leh vuaahna bang a thuaah va, ahi, hulou zong kolbut leh suangkul a khum bangin a um uh;

³⁷ Suang a seh in a um va, singaat a aattan in a um va, namsaau a saatlup in a um va; belaam vun leh keel vun silh in a vaah vai va; gentheitahin, gimthuaah in, sawih in a um uhi.

³⁸ (Hute a diingin chu khovel umna taah ahi sih hi; ) gamdaite ah bang, taang ah bang, kawlbuuh ah bang, leikohawm ah bang a vaah lehleh uhi.

³⁹ Huleh hite zousiah in a ginna jiah va phatna loh zou in, silchiam a tang sih uhi.

⁴⁰ Ajiahchu eihaw tellou a amahuh suhbukim a, a umlouhna diingin Pathian in eihaw diingin sil hoihzaw khat guatsa in a koih hi.