GALATIATE 4 - Thuhun Thah (BSI)

Khrist ginna jala Pathian ta hihna

¹ Hizongleh hichi'n ka chi hi, Gouluahtu diing chu bangkim tunga houtu hizongleh naupang ahih laisiah, suaah toh kilimdanna a nei tuan sih hi.

² A pa hunguat a tun masiahin a dontute leh a enkoltute nuaiah a um zaw hi.

³ Huchibang mahin ei zong naupang i hih laiin khovel thubulte nuaiah suaah in ina um uhi.

⁴ Hizongleh a hunbi ching ahung tuntahin, Pathian in a Tapa, chu numei suanin, daan nuai a bawl in ahung sawlkheta hi,

⁵ Ta hihsahna i muhtheihna diing a, daan nuai a umte tankhe diingin.

⁶ Huleh ta na hih jiahun Pathian in a Tapa Hagau chu, Abba, Pa, chia kikou in na lungtang vah ahung sawlkheta hi.

⁷ Huchi'n suaah na hi nawn sih a, ta na hi zawta hi; huleh ta na hihleh, Khrist jala Pathian gouluahtu diing zong na hi hi.

⁸ Huchi hitamahleh, Pathian na heet ma un, a pianzia mawng va pathian hiloute nna nana tong uhi.

⁹ Hizongleh tu a Pathian na hung heet nung va, ahihlouhleh Pathian heet mi na hung hihzawh mah nung va, bang diinga thubul zawngkhal leh manlouhte suaah a luut kiit ut a, kiheikiit na hi viai?

¹⁰ Nite, hate, hunte leh kumte na tang veu uh.

¹¹ Bangchi aha in na tungvah ka tonggim thawnkha diing chih ka hung lausah hi.

¹² Unaute, ka hung ngen hi, keimah bangin um un; ajiahchu kei zong nanguh bangin ka um hi; ka bangmah na suse hial sih uhi.

¹³ Na kawmva tanchinpha ka soi masatna pen chu ka tahsa haatlouhna pum in ahi chih na he uhi.

¹⁴ Huleh ka tahsa a nanguh diing a ze-etna um chu na musit sih va, nual zong na nual sih uh, hizongleh Pathian angel bang leh, Khrist Jesu bang hialin na hung pom zaw uhi.

¹⁵ Ahihleh vangpha na kisahna uh khoi a um ahitai? Ajiahchu, hithei hile bawn na mit uh kheidoh in na hung pe hial diing uh chih heetpihna ka hung nei hi.

¹⁶ Huchi a thutah ka hung hilh jiahin na meelma uh hung hita ka hiai mah?

¹⁷ Amahun phatuamngaitahin nanguh ahung hawl va, a hoih lamin ahi sih hi; nangun amahuh na hawl theihna diing va, hung poseh tum ahi zaw uhi.

¹⁸ Hizongleh bangchihtan a a hoih lam a phatuamngaitah a hawl a um zing chu a hoih hi, na kawmva ka um sung chauh hilou in.

¹⁹ Ka naute aw, nanguh a Khrist siam piching a a um masiah nausuaahnat thuaahin ka hung thuaah kiit hi,

²⁰ Tuin na kawmva um a, ka aw suhlimdang ka ut ngei mai; ajiahchu na tung thu uh ka hung lauthawngpih hi.

²¹ Hung hilh un, nanguh daan nuaia um utte, daanthu ngaikhe lou na hi viai mah?

²² Ajiahchu hichibang a gelh ahi, Abraham in tapa nih a nei a, khat chu a suaahnu toh, huleh khatpen chu a suaahlounu toh.

²³ Hizongleh suaahnu laha chu tahsa daan a piang ahi a; suaahlounu laha pen chu thuchiam jiaha piang ahi, chih.

²⁴ Hi thu hi tehkhinna ahi; hi numei nihte chu thuhun nihte ahi uh; khat chu Sinai taang apat sala taang diinga ta neinu ahi a, huchu Hagar ahi.

²⁵ Huleh Hagar chu Arabia gam a Sinai taang ahi a, tulaia um Jerusalem, huleh a tate toh sala taang khawm kisoina ahi.

²⁶ Hizongleh tunglam Jerusalem chu a zalen a, huchu i bawnva nu ahi.

²⁷ Ajiahchu hichi'n a kigial hi, Nang, ta nei lou a chiingnu, nuamin; nang, nausuaahnat thuaahlounu, ngaihtahin kikoudoh in; ajiahchu pasal neinu sangin a tang a umnu in ta a nei tamzaw hi chih.

²⁸ Huchi'n unaute, eiuh chu Isaak banga thuchiam tate i hi uhi.

²⁹ Hizongleh hulaia tahsa daan a piangin Hagau daan a piang a sawi bangin tuin zong huchi ahi.

³⁰ Ahihvangin lah Pathian lehkhathu in bang ahiai a soi? Suaahnu chu a tapa toh delhmang un; suaahnu ta pa in suaahlounu tapa toh gou a luahkhawm sih diing hi, a chi hi.

³¹ Huchi'n unaute, suaahnu tate i hi sih a, suaahlounu tate i hi zaw uhi.