GALATIATE 1 - Thuhun Thah (BSI)

Chibaibuuhna

¹ Paul, sawlleh, (mihing apat hilou, mihing vanga zong hilou, Jesu Khrist leh Pa Pathian, misi lah akipana amah kaithoutu vang a hizaw) in,

² Huleh ka umpih unau zousiahte’n, Galatia gam a kouhtuamte kawmah;

³ Pa Pathian leh i Lalpa uh Jesu Khrist kawma kipan hehpihna leh hamuanna na kawmvah um hen,

⁴ Amah chu Pathian leh i Pa uh deihdan dungjuiin tulai khovel giloutah lah akipan ahung suahtaatsah theihna diingin i sualnate luang in a kipeta hi.

⁵ Pathian kawmah loupina kumtuang kumtuang in um zingta hen. Amen.

Galatiate tung a Paul lungkiahna

⁶ Khrist hehpihna a nanguh hung koutu apat tukikal a tanchinpha danga na kituan mei uh thumah ka sa hi;

⁷ Huchu tanchinpha dang ahi sih a; hizongleh nanguh hung subuai in Khrist tanchinpha ahilou zawng a hei ut mi khenkhat a um ahi.

⁸ Hizongleh keiuh hiin, vaan apat angel hitaleh, tanchinpha na kawmva ka soi uh loungal tanchinpha dang mawngmawng na kawmva hung soi a umleh haamseloh in um heh.

⁹ Tuma a ka soi mahbangun tuin zong ka soi jel ahi, tanchinpha na muhsa pen uh loungal tanchinpha dang mi koipouh in na kawmva ahung soi leh haamseloh in um heh.

¹⁰ Bang jiahin ahiai i chihleh ke’n tuin mihing ahiai ka zawl, Pathian ahiai? ahihlouhleh mihing suhlungkim tum ka hiai mah? mihing suhlungkim tum nalai hitaleng Khrist suaah ka hi sih diing hi.

Paul tanchinpha mihing a kipan ahih louhdan

¹¹ Huchi'n unaute, ka tanchinpha soi chu mihing lam thu ahi sih chih ka hung hesah ahi.

¹² Ajiahchu mihing apat ka muh zong ahi sih a, mi hung hilh zong ka hi sih, hizongleh Jesu Khrist kilaahna jiaha ka muh ahi zaw hi.

¹³ Ajiahchu malai a Juda mite biah dana ka umlai a ka tungtaang, bangchi banga Pathian kouhtuamte theihtawpa sawi a, subuaitu ka hihdan na zata uhi.

¹⁴ Huleh ka pulepate thugousiah a phatuam ka ngaih diahkhol jiahin Judate biahdan lama zong ka chipihte laha ka khangual tampi kana khup hi.

¹⁵ Hizongleh ka nu gilsunga ka umlai apat hung koihtuamtu leh, a hehpihna a hung koutu Pathian in,

¹⁶ Jentelte laha a tanchinpha ka soi theihna diingin a Tapa chu keimaha kilaahsah pha a sah laiin tahsa leh sisan ka dong sih a,

¹⁷ Jerusalem khua ah, kei sanga sawlleh hi masate kawma zong ka chiahtou sih a; Arabia gam ah ka chiah zaw a, huin Damaska khua ah ka hung kileh kiitta hi.

¹⁸ Huin kum thum nungin Jerusalem ah Peter kimuhpih diingin ka chiahtou a, a kawmah ni sawm leh ni ngaa ka va um hi,

¹⁹ Hizongleh Lalpa sanggampa Jakob chih louh sawlleh dangte khatbeeh ka mu sih hi.

²⁰ Tuin na kawmva ka thu gelhte, en un, Pathian ma ah ka zuau lou ahi.

²¹ Hunungin Syria leh Silisia gam ah ka hungta hi.

²² Huleh Judia gam a Khrist a um kouhtuamte meelheet louhin ka um nalai hi.

²³ Hizongleh, tuma a eiuh hung sawipa’n khatvei laia a suhsiat taah ginna chu tuin a taangkoupihta, chih thu chauh a ja uhi.

²⁴ Huleh amahun keimah ah Pathian a paahtawita uhi.