EPHESITE 5 - Thuhun Thah (BSI)

¹ Hujiahin ta deihtahte bangin Pathian umdan juitute hi un;

² Khrist in ahung lungsiat a, ei u’diing a Pathian kawma silpiah leh kithoihna namtui diinga a kipiah bangin, lungsiatna ah um un.

³ Hizongleh misiangthoute umdan diinga kilawm him in, kingaihnate leh bolhhohna zousiah, huaihamna toh na lahvah lohkhaah in um sih heh;

⁴ Zahmohthute, thu ngolhuai a houlimte, chiamnuih thute bang zong kilawm lou ahi; hute sangin kipaahthu soi zaw un.

⁵ Ajiahchu kingaihhaat leh, mithanghuai leh, mihuaiham in (huchu milim bia ahi), Khrist leh Pathian gam ah tan mawngmawng a nei sih uh chih na he uhi.

⁶ Mi koimah in thu meimei pouhin hung heem sih u’heh; ajiahchu hi silte jiahin Pathian lungthahna chu thumanglou tate tungah a tung veu hi.

⁷ Hujiahin amahuh kithuahpih sih un.

⁸ Bang jiahin ahiai i chih leh, nanguh tumalai in mial na hi va, tuin chu Lalpa ah vaah na hita uh; vaah tate bangin um un.

⁹ (Ajiahchu, Hagau gah ahihleh hoihna chinteng leh dihtatna leh thutah ah ahi).

¹⁰ Lalpa deihzawng bang aha chih en chian in.

¹¹ Huleh mial natoh gah neiloute toh kithuahkhawm na nei sih unla, hizongleh a dih louhdan hesah zaw un.

¹² Ajiahchu a guuh a, a silbawlte uh chu a soi zong a zumhuai hi.

¹³ Hizongleh sil zousiah a dih louhdan heetsah a um chu vaah suhlat ahi; ajiahchu sil sulang photmah chu vaah ahi.

¹⁴ Hujiahin ama’n, Nang ihmu khang inla, misi laha kipanin thou in, huchi'n Khrist in ahung salhvaah diing hi, a chi hi.

¹⁵ Huchi'n na umdan uh pilvaang un, mingolte banga um louin, mipilte bangin um un.

¹⁶ Nite a hoih louh jiahin hunlemtaang lei un.

¹⁷ Hujiahin ngol sih unla, Lalpa deihzawng bang ahiai chih hesiam zaw un.

¹⁸ Huleh uain kham in um sih unla, hu a’chu kisuum louhna a um hi; hizongleh Hagau a dim in um zaw un.

¹⁹ Phatna late, Pathian late, huleh hagaulam late a nang uleh nanguh kihou in, na lungtang vah Lalpa diingin kituaahtah leh kilawmtahin la sa un.

²⁰ Bangkim tungah i Lalpa uh Jesu Khrist minin Pathian leh Pa kawmah kipaahthu soi ngiitngeet un.

²¹ Pathian laudan siamna ah khat leh khat kituluuttuah chiat un.

Khristian innkuan umdan diing

²² Jite haw, Lalpa kawma bangin na pasalte uh kawmah kituluut un.

²³ Ajiahchu Khrist kouhtuam lutang ahih a, sapum hundampa ahih bangin, pasal chu ji lutang ahi.

²⁴ Hujiahin kouhtuam Khrist kawma a kituhluut mahbangin, jite chu sil bangkimah a pasalte uh kawmah kituluut u’heh.

²⁵ Pasalte haw, Khrist in kouhtuam a lungsiat a, a luang va a kipiah bangin, nangun zong na jite uh lungsiat un.

²⁶ Amah u’chu tui a sil a, thu a, a suhsianga a sawpsiang theihna diingin,

²⁷ Huchia amahuh chu buahbaanglou, meelhemlou leh huchibang mawngmawng um lou; hizongleh siangthou leh soisiat bei, kouhtuam loupitah amah a kipiah theihna diingin.

²⁸ Hujiahin pasalte’n chu amahuh sapum bangin a jite uh a lungsiat diing uh ahi; A ji lungsiatpa chu amah kilungsiat ahi.

²⁹ Ajiahchu koimah in amah tahsa a haw ngei nai sih; Khrist in kouhtuam a chawm a, a deihthoh bangin, a chawm in a deihthoh zaw hi.

³⁰ Ajiahchu eite chu amah sapum leh, tahsa leh, guh hiangte i hi uhi.

³¹ Hikhu jiahin pasal in a pa leh a nu a nuse diing a, a ji toh a kizop diing, huleh a nih un tahsa pumkhat ahung hita diing uhi.

³² Hichu thuguuh kiphual loupitah ahi; hizongleh ke’n chu Khrist leh kouhtuam thu ahi ka soi.

³³ Banghitaleh, na lahva koipouh in amah a kilungsiat bangin a ji lungsiat heh; huleh ji chu a pasal zahtaat diingin pilvaang heh.