EPHESITE 4 - Thuhun Thah (BSI)

Pathian kouhna bang a umdan diingte

¹ Hujiahin kei, Lalpa a mitaang in, kouh a na umna utoh kilawm tawh a gamta diingin ka hung ngen hi.

² Kingaihngiamna leh thunuaigolhna zousiah, thuaahtheihna toh, lungsiatna a kithuahzoutuah chiat in;

³ Lemna gui a kaankhawm a Hagau kipumkhatna chu vom tinten in.

⁴ Kouh a na umna pen uh kinepna, mun khat a kouh na hih bangmah un, sapumkhat leh Hagau khat,

⁵ Lalpa khat, ginna khat, baptisma khat,

⁶ Pathian khat leh mi zousiah Pa, bangkim tunga um leh, bangkima um, huleh nanguh zousiaha um, a um hi.

⁷ Hizongleh Khrist silthawnpiah tehna bangjelin hehpihna chu i kawm chiat ah piah in a um hi.

⁸ Hujiahin ama’n, Tunglama a kaltouh laiin matte chu sal in a pui a, huleh mihingte kawmah silpiahte a pia hi, chi'n a soi hi.

⁹ (Huchi'n, a kaltou chihchu, a masa in leimun ngiampente ah a kumsuh chih louh bangdang chihna a diai?

¹⁰ A kumsuh pen chu sil zousiah a suhbukim theihna diing a vaan zousiah tungpeh a kaltoupa mah ahi).

¹¹ Huleh ama’n khenkhatte chu sawlleh, khenkhatte zawlnei, khenkhatte tanchinpha soitu, khenkhatte pastor, huleh khenkhatte chu thuhilhtu a pia hi.

¹² Misiangthoute suhbukimna diing leh, thunatohna natohna diing leh, Khrist sapum bawl hoihna diingin:

¹³ Ginna leh Pathian tapa heetna lama kithutuaah a, piching a, Khrist taangchinna dungtan i phaah chiat masiah uh;

¹⁴ Huchi'n dihlouhna heemna bangin, lepchiahpil a mihing heem a um a, thuhilhna huih chintenga lehlam lehlam a muutleeng lehleh naupangte hi nawnta louin,

¹⁵ Hizongleh lungsiatna a thutah soi in, sil zousiah ah amah ah i khang tou thei zaw diing hi, amah chu lutang ahi, Khrist chu.

¹⁶ Amah apat sapum pumpi kituaahtaha zopkhawm a um in, guhtuah chintengin sahiang dang chinteng natohna a piahdan dungjui chiat a, sapum chu lungsiatna a kibawl hoihin a khang tousah ahi.

¹⁷ Hujiahin hi ka soi hi, huleh Lalpa ah ka hung hesah hi, Jentelte a lungsim tavai uh pua a, a um bangun um nawn sih un,

¹⁸ A heetsiamna uh suhmial a um in, a sungva heetlouhna uh jalin Pathian hinna apat khen in a um uh, a lungtang uh ngon jiahin.

¹⁹ Amahun heettheihna mawngmawng a neih nawn louh jiahun sil sianglou chinteng huaihamtah a bawl diingin huuhna ah a kipumpiahta uhi.

²⁰ Hizongleh nangun chu Khrist thu huchi bangin na zil sih uhi.

²¹ Jesu a um, thutah dungjuia amah thu ja a amah thuhilh a um na hih photmah uleh,

²² Na nidanglai umdan va mihing lui, heemna duhgawlna banga hoihlou deuhdeuh chu hawhkhia unla.

²³ Na lungsim hagau vah a thah in hung um un,

²⁴ Mihing thah, dihtatna leh siangthouna tah a Pathian banga siam in kithuam le u’chin, chih.

²⁵ Huchi'n zuau soi tawpsan in, mi chinin a veengte kawmah thutah soi chiat un; ajiahchu eihaw khat leh khat kihiangtuah chiat i hi uhi.

²⁶ Lungthah unla, sual chu sual sih un; na lungthahna uh ni in tumkhum sih heh.

²⁷ Diabol zong mun ot sih un.

²⁸ Guta in gu nawn sih henla, tasam kawm a piah diing a neih theihna diingin, a khuta sil hoih bawl in tonggim zaw heh.

²⁹ Na kam vapat thusia pawt sih henla, hizongleh a ngaikhetute kawma hehpihna a piah theihna diingin, bawl hoihna diingin thu hoih pawt zaw heh.

³⁰ Huleh Pathian Hagau Siangthou sulungngai sih un, tatna ni a diinga amah a chiamchih na hi uh.

³¹ Khaatnate, lungthahnate, hehnate, haanate, kisoisiatnate, hite zousiah na lah vapat koihmang in umta heh, giitlouhna zousiah toh;

³² Khat leh khat kingainatuah chiat unla, lungnem unla, Pathian in Khrist jiaha nanguh ahung ngaihdam bangin, nanguh zong kingaidamtuah chiat un.