EPHESITE 3 - Thuhun Thah (BSI)

A khang a khang a thuguuh kiphual, kouhtuam

¹ Hikhu jiahin kei Paul, nanguh Jentelte diing a Jesu Khrist suangkul taang in,

² Nang u’diing a Pathian hehpihna kepna nna piah ka hih na jata ngei diing va;

³ Huchia kilaahna a thuguuh kiphual ka kawma ahung heetsah, (tuma a tomtakhat a ka gelh thute bang.

⁴ Huchu na sim chiangun Khrist thuguuh kiphual ka heetdan na hesiam diing uhi).

⁵ Huchu tulai a sawlleh siangthoute leh zawlneite kawma Hagau a heetsaha a um bangin, nidang laiin mihing tate kawmah heetsah in a um ngei sih hi;

⁶ Huchu hi ahi, tanchinpha jiahin Khrist ah Jentelte chu gouluahpihte, tahsa khata umte, thuchiam tanpihte ahi diing uh.

⁷ A silbawltheihna natohna a, a thawna Pathian hehpihna hung kipia dungjui a hu tanchinpha natong diing a siam ka hi.

⁸ Jentelte kawma Khrist hauhsatdan hawldoh seeng guallouh thute soi diing a kei misiangthoute zousiah laha neupen sanga neuzaw kawmah hi hehpihna chu piah ahi.

⁹ Kumtuanga kipana Jesu Khrist mang a sil zousiah siamtu Pathian a phual a um thuguuh kiphual kipawlkhawmna chu mi zousiah musah diingin;

¹⁰ Huchi'n tu a vaan munte a lalna leh thuneihnate kawmah Pathian pilna chinteng kouhtuam jiaha heetsaha a um theihna diingin.

¹¹ I Lalpa uh Khrist Jesu a bawl a tup, a kumtuang silguat bang ngei in;

¹² Amah ginna jiahin eihaw’n amah ah haansanna leh muangtah a luut theihna i nei uhi.

¹³ Hujiahin nanguh diing a ka gimthuaahte jiaha lungthuai lou diingin ka hung ngen hi, huchu na loupina uh ahi.

¹⁴ Hikhu jiahin i Lalpa uh Jesu Khrist Pa ma ah ka khupdin a,

¹⁵ Lei leh vaan a innkuan chinteng min phuaahkhiahnapa ma ah,

¹⁶ A loupina hauhdan bang jel a, a Hagau jiaha mihing sungnung lama silbawltheihna a suhhaat a ahung umsah theihna diingin;

¹⁷ Khrist chu ginna a na lungtang va a teen theihna diingin; nanguh lungsiatna a zungha leh kiptah a um a,

¹⁸ Misiangthoute zousiah toh a letdan, a saudan, a saandan, huleh a thuuhdante na heetchian theihna diing uleh,

¹⁹ Khrist lungsiatna heetphaah guallouh na hung heet va, Pathian taangchinna zousiaha suhdim a na um theihna diingun.

²⁰ Huchi'n eimaha tong jel silbawltheihna dungjui a i nget leh i ngaihtuah sanga loupizaw a bawltheitu kawmah,

²¹ Khrist Jesu jiahin kouhtuam ah kumtuang in, a khang a khang in loupina umta hen. Amen.