EPHESITE 1 - Thuhun Thah (BSI)

Chibaibuuhna

¹ Paul Pathian deihzawng a Jesu Khrist sawlleh in, Ephesa khua a um misiangthoute leh Khrist Jesu a mi ginumte kawmah;

² Pathian i Pa uleh Lalpa Jesu Khrist kawma kipan hehpihna leh hamuanna na kawmvah um hen.

Pathian phatna

³ Vaanmunte a Khrist a hagaulam vangpiahna chinteng a vang hung pepa i Lalpa uh Jesu Khrist Pathian leh Pa chu phatin um hen:

⁴ A ma a siangthou leh soiselbei a i um theihna diing a leilung pian ma a lungsiatna a Khrist a ahung na teel dungjuiin;

⁵ Amah lungguat leh deihzawng bangin, Jesu Khrist jiaha amah a diinga ta a bawl diingin ahung na guatlawhta hi,

⁶ A hehpihna loupidan paahtawi diingin, hu hehpihna a’chu a lungsiat mahmahpa ah deihtaah in ahung siamta hi.

⁷ Amah ah a sisan jalin tatkhiahna i nei a, a hehpihna hauhdan dungjui a i sualnate ngaihdamna.

⁸ Hu hehpihna ah ama’n pilna leh lemheetna zousiah in ahung vuh hi.

⁹ Ama’n a lungdeihzawng a amah a bawl a tup bangin a lungguat thuguuh i kawma hung hesah in;

¹⁰ Hunbi khenna kim ahung hun chiang a amah ngei a vaan a sil umte leh, leitung a sil umte a bawna Khrist a khata a suhtuahkhawmna diingin,

¹¹ Amah lunggel bang jel a sil zousiah bawlpa tup banga guatlawhsa hi in, amah ah gouluah diing a siam i hi uhi.

¹² Eiuh Khrist a na ging masate, a loupidan paahtawina i hihtheihna diingin.

¹³ Amah ah nanguh zong thutah thu, na hutdamna tanchinpha uh na ngaihkhiah va, gin zong na gintaat nungun, amah ah chiamna Hagau siangthou a chiamchih in na um uhi,

¹⁴ Huchu Pathian loupidan paahtawina diing a gou leisa tatkhiahna hun masiah diing a i gouluah diing uh khaamna ahi.

Pathian heetna diing leh silbawltheihna diinga haamteina

¹⁵ Hujiahin ke’n zong Lalpa Jesu a na ginna uleh, misiangthoute zousiah tung a na lungsiatna uh ka na jah in,

¹⁶ Ka haamteinate ah na min uh lou in, nanguh jiaha kipaahthu soi ka tawp sih hi;

¹⁷ I Lalpa uh Jesu Khrist Pathian, loupina Pa in amah heetna lam thu a pilna leh kilaahna hagau nanguh ahung piah theihna diingin;

¹⁸ Na lungsim mitte uh suhvaah a hung um a, a kouhna kinepna bang, misiangthoute a, a goutan diing loupina hauhzia bang,

¹⁹ Huleh a silbawltheihna haatna natoh dungjui a ei a gingtate lama a silbawltheihna nasatdan bang na hung heettheihna diingun.

²⁰ Misi laha kipana a kaihthoh lai leh, vaan munte a, a jiatlam a,

²¹ Lalnate leh silbawltheihnate leh, haatnate leh, vaihawmnate leh, hi khovel chauh hilou a khovel hung tung diing a zong min kiphuaah zousiah tunglam peha a tousah lai a Khrist a, a bawl chu.

²² Huleh sil zousiah a keeng nuaiah a koihta a, amah chu sil zousiah tungah lutang hi diingin kouhtuam kawmah a pia hi,

²³ Huchu a tahsa ahi, a taangchinna a bangkim zousiah sudimpa ngei.