Sekaraea 2 - Pijin Deuterocanon

Mektri spesol drim: Man wea i holem making teip

¹ Mi lukim narafala spesol drim moa, an long spesol drim ya mi lukim wanfala man wea hemi holem making teip.

² An mi askem hem olsem, ??Yu go long wea?? Hemi ansa olsem, ?Mi go fo mesarem saes blong taon long Jerusalem fo faendemaot longfala an bikfala blong hem.?

³ Den enjel wea hemi bin gohed fo tok wetem mi hemi stat fo goaot, bat mi lukim narafala enjel hemi kam fo mitim hem.

⁴ An narafala enjel ya hemi tok olsem long hem, ?Yu resis go fo talem disfala yang man wea hemi holem making teip ya wea Yawe hemi tok olsem, ?Jerusalem bae hemi fulap long plande pipol an plande animol tu. Ples ya bae hemi kamap bikfala fogud, wea olketa no nid fo bildim wolston raonem.

⁵ Mi seleva nao bae mi wolston fo gadem taon ya olsem faea wea hemi laet raonem. An bikfala paoa blong mi bae hemi saenaot insaet long taon ya.??

Yawe hemi kolem olketa pipol blong hem fo kam hom

⁶ Yawe nao hemi tok olsem long olketa pipol blong hem, ?!Olketa! !Ranawei kam from datfala ples long not! Mi bin ronem yufala fo stap olobaot long evri ples.

⁷ Bat distaem, yufala blong Jerusalem, yufala mas ranawe kam from biktaon long Babilon.?

⁸ Bihaen, Yawe hu hemi garem evri paoa hemi siusim mi fo go talemaot disfala mesij abaotem olketa kantri wea i mekful long olketa pipol blong hem. Hemi tok olsem, ?Taem eniwan hemi spoelem yufala pipol blong mi, hemi olsem wea hemi spoelem nambawan spesol samting blong mi.

⁹ Mi nomoa bae mi faet agensim olketa, mekem yufala hu i slev blong olketa i save kamap strong fo spoelem olketa.? Long wei ya nao, bae yufala pipol blong Jerusalem save dat Yawe hu hemi garem evri paoa nao, hemi bin sendem mi olsem profet blong hem.

¹⁰ Hem ya mesij blong Yawe. Hemi tok olsem, ?!Olketa pipol blong Jerusalem! Yufala mas singaot fo hapi. Bae mi kam stap wetem yufala.

¹¹ Long datfala taem, plande pipol long olketa narafala kantri bae i kam long mi Yawe, fo joen wetem yufala pipol blong mi, an bae mi stap wetem yufala.? Long wei ya nao, bae yufala save dat Yawe hu hemi garem evri paoa, hemi sendem mi kam long yufala.

¹² Distrik long Jiuda bae hemi kamap spesol ples blong Yawe long holi lan blong hem. An bae hemi siusim moa Jerusalem olsem spesol taon fo hemi stap long hem.

¹³ So yumi evriwan long wol mas stap kuaet frant long Yawe, bikos distaem, hemi kamaot from holi ples blong hem long heven.