Sams 92 - Pijin Deuterocanon

(Toktok go long God.)

¹ Lod Yawe, yu nao yu God hu hemi hae tumas, hemi gud tumas fo mi talem tengkiu long yu. Ya, hemi gud tumas fo mi singsing fo preisim nem blong yu.

^2-3 Hemi gud tumas fo singsing wetem olketa de-deferen kaen gita fo talemaot olketa gudfala wei blong yu. Long evri moning, hemi gud tumas fo mi talemaot dat lav blong yu hemi bikfala tumas. An evri naet, hemi barava gud fo mi talemaot dat yu kipim olketa promis blong yu.

⁴ Lod Yawe, mi hapi tumas from olketa bikfala waka blong yu. Ya, mi singsing fo preisim yu fo olketa samting wea yu bin duim fo mi.

⁵ Lod Yawe, olketa waka blong yu hemi barava bikfala tumas, an olketa tingting blong yu tu hemi had tumas fo mifala save long hem.

⁶ Olketa hu i no waes, an olketa hu i duim olketa krangge samting, bae olketa kanot save long wanfala samting.

⁷ Samting ya nao hemi olsem, olketa nogud pipol save grouap gudfala olsem gras, an olketa wea i duim olketa nogud samting olketa save garem gudfala laef long disfala wol, bat, bae yu spoelem olketa finis.

⁸ Bat yu Lod Yawe, oltaem yu nao yu hae tumas.

⁹ Mifala save dat olketa enemi blong yu bae olketa dae. Ya, bae yu winim evri nogud pipol ya.

¹⁰ Yu bin mekem mi barava strong fogud, an mi hapi tumas bikos yu bin blesim mi. Ya, hemi olsem yu oelem bodi blong mi.

¹¹ Mi bin lukim finis taem yu winim olketa enemi blong mi long faet, an mi bin herem finis taem olketa nogud pipol ya i safa an krae.

(Toktok go long olketa pipol.)

¹² Olketa stretfala pipol bae i kamap gudfala olsem pam tri, an bae olketa kamap strong olsem olketa sida tri long Lebanon.

¹³ Ya, bae olketa stap olowe insaet long Tambuhaos blong Yawe. An bae olketa garem gudfala laef long Tambuhaos blong God.

¹⁴ Nomata olketa ya i olo finis, olketa strong olowe nomoa olsem olfala tri wea hemi strong an laef yet an hemi gohed yet fo garem plande frut.

¹⁵ Evrisamting ya nao hemi som dat wei blong Yawe hemi stret fogud, An hemi som dat God hu hemi gadem mi hemi stret olowe.