Sams 8 - Pijin Deuterocanon

(Toktok go long God.)

¹ Lod Yawe, yu nao yu Masta blong mifala. Evriwan i luksave long bikfala paoa blong yu long evri ples long wol. Evriwan i gohed fo preisim nem blong yu, an disfala preis ya hemi go-go kasem antap go long skae.

² Nomata olketa pikinini an olketa bebi tu i gohed singsing fo preisim yu. Yu stap long wanfala strongfala sefples wea olketa enemi blong yu i no save faet agensim yu. An olketa wea i gohed fo agensim yu olketa no save spoelem yu.

³ Taem mi lukap go long skae wea yu bin mekem, an mi lukim mun an olketa sta wea yu bin putum long olketa barava ples blong olketa,

⁴ mi save tingting olsem, “Mifala pipol i samting nating nomoa ya. Hemi no fitim nomoa fo yu tingting long mifala. ?Fo wanem nomoa yu lukaftarem gudfala long mifala?”

⁵ Nomata olsem, yu seleva nao bin mekem mifala, an yu liftimap nem blong mifala an yu givim paoa long mifala fo kamap barava hae olsem king, bat yu nomoa yu hae winim mifala.

⁶ Yu nao yu siusim mifala fo masta long olketa samting wea yu bin mekem, an fo lukaftarem evrisamting ya.

⁷ Olketa samting ya nao, olketa sipsip an olketa buluka an olketa wael animol long bus,

⁸ an olketa bed an olketa fis an evrisamting insaet long solwata.

⁹ Lod Yawe, yu nao yu Masta blong mifala. Evriwan i luksave long bikfala paoa blong yu long evri ples long wol. (Singsing blong Deved.)