Sams 4 - Pijin Deuterocanon

(Toktok go long God.)

¹ God, oltaem yu gohed fo saet wetem mi, so plis yu ansarem prea blong mi. Taem wea mi stap long trabol, yu bin gohed fo helpem mi. Nao plis yu kaen long mi, an herem kam prea blong mi.

(Toktok go long olketa pipol.)

² ?Fo hao long nao bae yufala gohed fo tokspoelem mi? ?An fo hao long nao bae yufala gohed fo laekem olketa samting wea i nogud? ?An fo hao long nao bae yufala gohed fo aftarem olketa laea wei?

³ Yufala mas save dat Yawe hemi bin siusim fo hem seleva olketa, hu i tinghevi long hem, an hemi herem mi taem mi prea long hem.

⁴ Sapos yufala filkros, yufala mas no letem kros blong yufala fo mekem yufala duim wanem hemi rong. Yufala mas tingting gudfala abaotem samting ya, taem yufala stap kuaet long bed blong yufala.

⁵ Yufala mas mekem olketa sakrifaes go long Yawe, olsem wea lo hemi talem, an yufala mas trastem hem.

(Toktok go long God.)

⁶ Plande pipol nao i gohed fo prea olsem, “Lod Yawe, plis yu luk kaen kam long mifala, an givim kam plande gudfala samting moa long mifala.”

⁷ Taem olketa ya i garem plande kaikai an plande waen, olketa hapi tumas. Bat yu mekem mi fo barava hapi moa.

⁸ Lod Yawe, taem mi leidaon, mi slip gudfala tumas, bikos yu nao yu gohed fo gadem mi gudfala, hem nao mi sef. (Singsing blong Deved. Hem nao fo hemi singim wetem bambu paep.)