Sams 2 - Pijin Deuterocanon

King wea God hemi siusim (Toktok go long olketa pipol.)

¹ ?Waswe nao olketa long olketa narafala kantri i kros tumas? ?Waswe nao olketa pipol ya i planem enikaen krangge samting?

² Olketa king long disfala wol i mekredi nao fo faet. Olketa hu i rulim olketa pipol long wol i joen tugeta nao fo faet. Olketa redi fo faet agensim Yawe an disfala king ya wea hemi bin siusim fo duim waka blong hem.

³ Olketa gohed fo tok olsem, “Yumi mas brekem paoa blong tufala ya wea hemi hevi antap long yumi, mekem yumi fri from han blong tufala.”

⁴ Yawe hu hemi King hemi gohed fo stap long heven an hemi gohed fo la-laf long olketa ravis plan blong olketa ya.

⁵ Hemi kros an hemi toktok strong long olketa olsem, “!Yufala lukaot ya!” An bikos hemi kros olsem, olketa fraet fogud an seksek nao.

⁶ Hemi tok olsem, “Mi bin putum finis king blong mi long Saeon, disfala holi maonten blong mi ya.”

⁷ King ya hemi tok olsem, “Bae mi talemaot samting wea Yawe hemi bin talem. Hemi talem finis long mi olsem, ‘Yu nao san blong mi. Stat tude mi nao dadi blong yu.

⁸ Yu save askem mi, mekem mi givim yu olketa narafala kantri, wetem olketa pipol long wol ya fo yu onam.

⁹ Bae yu kilim olketa pipol ya long wanfala longfala pis aean, an bae yu brekem olketa long olketa smolfala pisis, olsem glas wea hemi brek.’”

¹⁰ Dastawe nao, yufala olketa king mas herem gudfala olketa toktok ya, an yufala mas lukaot. Olketa lida long wol, yufala mas savegud long mining blong olketa toktok ya.

¹¹ Ya, yufala mas waka fo Yawe an yufala mas tinghae long hem. Yufala mas putum yufala seleva daon, an bae yufala i hapi.

¹² Hemi gud wea yufala i barava tinghae long Yawe, an yufala mas baodaon long san blong hem. Sapos nomoa, bae hemi kros, an no long taem bae yufala dae nao ya. Evriwan wea i go long hem fo hemi gadem olketa, olketa nao i hapi. (Singsing blong Deved. Hemi mekem bihaen long taem ya wea hemi ranawe from san blong hem Absalom hu hemi laek fo kilim hem dae.)