Sams 16 - Pijin Deuterocanon

(Toktok go long God.)

¹ Lod Yawe, plis yu lukaftarem mi, bikos oltaem mi trastem yu fo yu sevem mi.

² Yu nao yu Masta blong mi. Evri gudfala samting wea mi garem i kam nomoa from yu.

³ Olketa pipol long wol wea i obeim yu nao i barava nambawan pipol. An mi laekem tumas fo stap wetem olketa.

⁴ Olketa wea i wosipim olketa narafala god, bae staka trabol nao hemi kasem olketa. Bae mi no joenem olketa sakrifaes blong olketa ya, an bae mi no wosipim tu olketa god blong olketa ya.

⁵ Lod Yawe, yu nomoa yu givim laef long mi, an yu bin givim nao evrisamting long mi. Bae mi givim go laef blong mi finis nao long han blong yu.

⁶ Evrisamting wea yu givim long mi i barava gud tumas.

(Toktok go long olketa pipol.)

⁷ Bae mi gohed fo preisim Yawe, bikos oltaem hemi gohed fo lidim mi, an long naet, hemi givim gudfala tingting long mi.

⁸ Yawe hemi stap wetem mi olowe, an bikos hemi stap kolsap long mi, no enisamting save spoelem mi.

⁹ Hem nao mi barava hapi fogud, an laef blong mi hemi gudfala tumas, an mi barava sef nao.

(Toktok go long God.)

¹⁰ Mi barava sef, bikos yu no save letem mi go long Grev. Ya, yu no save letem mi hu mi tinghevi long yu, fo lus from yu taem mi dae.

¹¹ Yu bin som mi olketa wei fo kasem tru laef, an taem yu stap wetem mi, bae yu mekem mi hapi fogud. (Prea blong Deved.)