Sams 149 - Pijin Deuterocanon

Singsing fo preisim Yawe (Toktok go long olketa pipol.)

¹ !Yumi preisim Yawe! Yumi mas singim wanfala niufala singsing long Yawe. Ya, yumi mas preisim hem taem yumi hu i tinghevi long hem i kam tugeta fo wosip.

² Yumi blong Israel, yumi mas hapi bikos Yawe nao hemi mekem yumi. Ya, yumi olketa pipol blong hem long Saeon, yumi mas hapi bikos hem nao hemi king blong yumi.

³ Yumi mas dans fo preisim nem blong hem, an yumi mas bitim olketa dram an ringim olketa gita fo preisim hem.

⁴ Yawe hemi hapi tumas long yumi olketa pipol blong hem. Hemi haemapem yumi hu i lou, an hemi mekem yumi fo winim olketa enemi.

⁵ Yumi hu i tinghevi long hem, yumi mas hapi bikos yumi win long faet. Ya, yumi mas hapi an singsing go-go kasem delaet.

⁶ Hemi gud tumas sapos yumi holem olketa sap naef fo faet an yumi singaot fo preisim hem.

⁷ Hemi duim diswan mekem yumi save spoelem olketa narafala kantri, an yumi save panisim olketa pipol blong olketa.

⁸ An bae yumi save taemapem olketa king an olketa lida blong olketa ya long olketa bikfala sen.

⁹ Ya, bae yumi save panisim olketa kantri ya olsem wea God hemi bin talem. Hem nao wei wea Yawe hemi onarem yumi hu i tinghevi long hem. !Yumi preisim Yawe!