Sams 147 - Pijin Deuterocanon

Singsing fo preisim Yawe hu hemi garem evri paoa (Toktok go long olketa pipol.)

¹ Yumi preisim Yawe! Hemi gud fo yumi preisim God blong yumi. Ya, hemi barava fitim fo yumi singsing fo preisim hem.

² Yawe hemi gohed fo bildimap moa Jerusalem. Ya, hemi gohed fo tekem kambaek olketa pipol blong yumi hu i slev long narafala kantri.

³ Hemi mekem olketa hu i sore fo hapi moa, an hemi mekem olketa soa blong olketa fo kamap gud moa.

⁴ Hemi makem namba blong olketa sta, an hemi givim nem long olketa evriwan.

⁵ Ya, Masta blong yumi, hemi hae tumas an hemi garem evri paoa, an no eniwan save makem waes blong hem.

⁶ Yawe hemi helpem olketa hu pipol i mekem olketa safa fo spoelem laef blong olketa, bat hemi spoelem finis olketa nogud pipol.

⁷ Yumi mas singsing fo preisim Yawe. Ya, yumi mas singsing wetem olketa gita fo mekhae long God blong yumi.

⁸ Hemi mekem olketa klaod fo stap long skae, hemi givim kam ren long graon, an hemi mekem olketa gras fo grou long olketa hil.

⁹ Hemi givim kaikai long olketa animol, an hemi fidim olketa pikinini blong bed, taem olketa hanggre an krae fo kaikai.

¹⁰ Yawe hemi no hapi long olketa hu i dipen long olketa strongfala hos, an trastem olketa soldia fo gadem olketa.

¹¹ Bat hemi barava hapi long olketa pipol hu i tinghae long hem, an olketa hu i trastem hem bikos hemi tinghevi long olketa olowe.

¹² Yumi olketa pipol blong Jerusalem wea narafala nem blong hem nao Saeon, yumi mas preisim Yawe. Ya, yumi olketa pipol blong Saeon yumi mas preisim God blong yumi.

¹³ Hemi mekem olketa doa long wolston long Jerusalem fo hemi strong, an hemi gohed fo blesim yumi evriwan.

¹⁴ Hemi mekem yumi fo stap gudfala insaet long kantri blong yumi, an hemi givim olketa barava gudfala kaikai long yumi fo mekem yumi hapi.

¹⁵ Taem hemi tok nomoa long disfala wol ya, wanem hemi talem hemi hapen nao.

¹⁶ Long taem blong tukol, hemi mekem diu fo kamap olsem aes long graon, an hemi mekem snou fo kavaremap olketa ples olsem blangket.

¹⁷ Hemi mekem ston long aes fo foldaon kam olsem bikfala ren. ?Hu nao hemi fitim fo stanap strong taem wea hemi mekem tukol fogud?

¹⁸ Taem hemi tok nomoa, olketa aes i kamap wata nao, an taem hemi mekem win fo blou, aes ya hemi stat fo ran moa olsem wata.

¹⁹ Yawe hemi talemaot olketa toktok blong hem an olketa lo blong hem fo tisim yumi olketa pipol long Israel.

²⁰ Hemi no duim samting ya fo olketa pipol long olketa narafala kantri, bikos olketa no save long olketa gudfala tising blong hem. !Yumi preisim Yawe!