Sams 13 - Pijin Deuterocanon(Toktok go long God.) 1 ?Lod Yawe, fo hao long nao bae yu gohed nomoa fo fogetem mi? ?Olowe nao? ?Fo hao long nao bae yu gohed nomoa fo haed from mi? 2 ?Fo hao long nao bae trabol hemi gohed nomoa fo kasem mi? ?An fo hao long nao bae mi gohed fo sore nomoa evri de an evri naet? ?An fo hao long nao bae olketa enemi blong mi i gohed nomoa fo winim mi? 3 Lod Yawe, yu nao yu God blong mi. Plis yu luk kam long mi an herem kam krae blong mi. Plis yu mekem mi strong moa, an no letem mi dae. 4 Sapos yu no helpem mi bae olketa enemi blong mi i tok olsem, “Yumi winim hem finis.” An bae olketa hapi tumas bikos olketa daonem mi. 5 Bat mi trastem yu bikos lav blong yu hemi bikfala tumas. An bae mi hapi tumas, bikos yu nao bae yu sevem mi. 6 Lod Yawe, bae mi singsing long yu, bikos yu bin gud tumas long mi. (Singsing blong Deved.) |
Pijin Catholic Bible © Bible Society of the South Pacific, 2008.
Bible Society of the South Pacific