Sams 121 - Pijin Deuterocanon

(Toktok go long olketa pipol.)

¹ Mi lukap go long olketa maonten long Jerusalem, an mi askem olsem, “?Wea nao mi save faendem eniwan fo helpem mi?”

² Yawe nao hemi mekem skae an graon ya, an hem nomoa bae hemi helpem mi.

³ Ya, hemi no save slip an oltaem hemi lukaftarem yumi gudfala.

⁴ Hemi nating save slip an oltaem nomoa hemi lukaftarem yumi pipol blong Israel.

⁵ Yawe bae hemi stap long saet blong yumi, an bae hemi gadem yumi.

⁶ Ya, bae hemi gadem yumi evri de an evri naet.

⁷ Yawe bae hemi gadem yumi from evri trabol. Ya, bae hemi lukaftarem yumi mekem yumi save stap sef.

⁸ Stat distaem an gohed olowe nao, Yawe bae hemi gadem yumi evriwea yumi go long hem, an evriwea yumi stap long hem. (Singsing blong Deved. Olketa singim disfala singsing taem olketa goap fo fist long Jerusalem.)