Provebs 9 - Pijin Deuterocanon

Wei blong Waes an wei blong Krangge

¹ Waes Toktok hemi olsem woman hu hemi wakem seleva haos blong hem long sevenfala strong pos.

² Hemi kukim mit fo mekem fist, hemi redim waen, an hem putum finis olketa kaikai long tebol.

³ Hemi sendem go olketa wakamere blong hem, olketa stanap long hae ples long taon an kolaot go long evriwan olsem,

⁴ “!Yufala hu i no garem save, yufala kam! !Yufala hu i no garem gudfala tingting, yufala kam!

⁵ !Yufala kam kaikaim Save! !Yufala kam dringim Gudfala Tingting!

⁶ Lusim krangge wei blong yufala an falom wei blong mi, bae yufala garem laef.”

⁷ Stretem praod man bae hemi toknogud long yu, tokstrong long nogud man bae hemi tokspoelem yu.

⁸ No trae fo stretem man fo toknogud bae hemi heitem yu. Stretem waes man bae hemi lavem yu.

⁹ Tisim waes man bae hemi waes go moa, tisim stret man bae hemi save go moa

¹⁰ Stat blong waes nao, yu tinghae long Yawe. Fo save gudfala, yu mas save long Holi God nao.

¹¹ Waes toktok save mekem man laef fo longtaem.

¹² Sapos yu waes, bae yu hapi. Sapos yu les long save, bae yu safa.

¹³ Krangge hemi olsem woman hu hemi mekem tumas noes, hemi nating save sem, an hemi nating garem save.

¹⁴ Hemi sidaon long frant long haos blong hem wea hemi stap long hae ples long taon.

¹⁵ Hemi kolem olketa hu i gopas nomoa.

¹⁶ Hemi kol go long olketa olsem, “Yufala hu i no garem save, yufala kam long haos blong mi.” An hemi tok olsem long olketa hu i no garem gudfala tingting,

¹⁷ “!Wata wea yu stilim, hemi suit moa! !An kaikai wea yu kaikaim haed, hemi naes tumas!”

¹⁸ Bat olketa nating save nomoa dat dae blong olketa hemi insaet long haos ya, an olketa hu i go insaet i godaon finis insaet long grev.