Provebs 7 - Pijin Deuterocanon

¹ San blong mi, yu mas tingim evri toktok blong mi. Kipim evri strongfala toktok blong mi long maen blong yu.

² Kipim strongfala tok blong mi an bae yu laef, gadem evri tising blong mi olsem spesol pikinini blong yu.

³ Tingim toktok blong mi olowe, raetem insaet haat blong yu.

⁴ Tinghae long waes, olsem sista, tinghae long save, olsem brata.

⁵ Tufala bae stopem yu fo no go long ravis waef blong narafala man. Tufala save mekem yu no herem suit toktok blong datfala woman.

Woman wea wei blong hem hemi nogud

⁶ Taem mi stap long haos blong mi, mi luktru go long windo.

⁷ Mi lukim plande yangman wakabaot nomoa. Den mi luksave dat wanfala long olketa hemi no garem gudfala save yet.

^8-9 Long ivining taem hemi tudak finis, disfala yangman hemi goraon long kona long rod kolsap long haos blong wanfala ravis waef blong nara man.

¹⁰ Hemi olsem juri woman, kaleko blong hem nao hemi som. Hemi kamaot fo mitim hem wetem evri trik blong hem.

¹¹ Woman ya hemi no stap kuaet long haos, hemi nating fraet, hemi nating sem.

¹² Hemi stap long rod, hemi stap long kona, hemi stap long maket an evriwea.

¹³ Hemi kasholem disfala yangman. Hemi lukluk stret long ae blong hem, hemi kisim hem, an tok olsem,

¹⁴ “Fren, tude mi mekem sakrifaes long God, so plande kaikai hemi stap long haos.

¹⁵ Hem nao mi kam fo mitim yu. Mi bin lukaotem yu, nao mi faendem yu.

¹⁶ Olketa nambawan spesol sitbed from Ijip, mi putum finis long bed blong mi.

¹⁷ Olketa insens wea i barava smel naes tumas, mi rabem finis tu long bed blong mi.

¹⁸ !Yu kam, bae yumitufala save slip tugeta! Fulnaet ya, bae yumitufala hapi an plei insaet long bed.

¹⁹ Hasban blong mi hemi no stap, hemi go long wanfala farawe kantri.

²⁰ Hemi tekem staka seleni, an bae hemi no kambaek kuiktaem. Bihaen tufala wik, bae hemi kambaek.”

²¹ Toktok blong woman ya hemi tanem finis tingting blong yangman. Hemi drang finis long suit toktok blong hem.

²² Hem no tingim, bat hemi go wetem nao, olsem buluka hemi go fo dae, o olsem krangge man garem sen long lek blong hem.

²³ Seknomoa, wanfala aro hemi gotru long haat blong hem. Hemi olsem bed wea hemi flae, bat hemi pas insaet long net. Hemi nating save nomoa, hemi falom nao rod blong dae.

²⁴ Olketa yangman, lisin kam, herem gud toktok blong mi.

²⁵ Yu no letem woman olsem fo tanem tingting blong yu, o lidim yu long rong wei.

²⁶ Plande man i dae finis long wei blong hem, hemi spoelem staka man nao.

²⁷ Fo go long haos blong hem, hem nao bikrod godaon long grev.