Provebs 20 - Pijin Deuterocanon

¹ Dringim tumas waen, bae yu tokspoelem nara man. Dringim tumas bia, bae yu faet. Man spaka long tufala hemi no waes.

² Sif wea hemi kros, hemi olsem laeon hemi redi fo kaikaim yu. Mekem hem kros, bae yu dae.

³ Pipol tinghae long yu sapos yu les long raoa. Krangge man nomoa hemi raoa kuiktaem.

⁴ Lesibon hemi no plantem gaden, so taem hemi lukaotem kaikai hemi faendem nating nomoa.

⁵ Tingting blong waes man, hemi dip tumas. Bat man wetem gudfala save, hem save faendemaot.

⁶ Plande man talem yu save trastem olketa, bat hemi had tumas fo faendem kaen man olsem.

⁷ Gudfala man hemi stret nomoa, God hemi blesim pikinini blong hem.

⁸ Taem bikman hemi jajem man, hemi save faendemaot wanem hemi gud an wanem hemi nogud.

⁹ ?Hu nao save talem, “Tingting blong mi hemi klin, mi no duim eni rong samting?”

¹⁰ Yawe les long raverave skel. Kaen nogud skel olsem, hemi heitem.

¹¹ Yu save, nomata pikinini, wanem hemi duim i somaot wei blong hem. Taem wei blong hemi i gud an stret, bae yu save nomoa.

¹² Ae fo lukluk, an ia fo here, Yawe mekem tufala evriwan.

¹³ Yu laek fo slip, bae yu pua. Wekap an waka, bae yu garem plande kaikai.

¹⁴ Taem man peim samting hem komplen long praes, bat bihaen hem tokpraod long samting ya.

¹⁵ Gol hemi gud, an olketa pel an daemen i gud, bat maos wea i talemaot gudfala save, i nambawan.

¹⁶ Sapos man hemi promis fo peim kaon blong strensa, yu holem kaleko blong hem taem man no sensim kaon.

¹⁷ Fastaem, kaikai man stilim hemi suit. Bihaen, hemi sanbis long maos.

¹⁸ Lisin long plande advaes taem yu mekem eni plan. Yu laek fo mekem woa, lukaotem gudfala tingting.

¹⁹ Man fo toktok tumas, hemi spoelem nara man. No go kolsap long kaen man olsem.

²⁰ Man hu hemi tokspoelem dadi o mami blong hem, bae hemi dae, an go long ples i barava tudak.

²¹ Fastaem, man garem seleni an staka gud samting kuiktaem, bihaen, i spoelem hem.

²² No tok olsem, “Bae mi sensimbaek ravis samting ya.” Trastem Yawe nomoa, bae hemi sevem yu.

²³ Yawe heitem raverave skel. Kaen nogud skel olsem, hemi les long hem.

²⁴ Yawe makem finis wei blong evriwan. No eniwan barava savegud long wei blong hem seleva.

²⁵ Kuiktaem nomoa man hemi mektambu long samting, bat hemi trap bikos bihaen hemi tingim gud wanem hemi duim.

²⁶ Bikman wea hemi waes, hemi luksave long ravis man, an bae hemi panisim hem nogud.

²⁷ Haat blong man hemi olsem laet blong Yawe, no enisamting long laef hemi save haed.

²⁸ Taem bikman hemi tinghevi long pipol an lidim olketa long stret wei, hemi save gohed fo lidim pipol olowe.

²⁹ Tinghae long yangman, hemi strong. Tinghae moa long olo wetem waet hea, hemi waes.

³⁰ Panisim man wetem stik o wip, bae hemi aotem wei nogud. Wipim man fo mekem laef blong hem stret.