Provebs 2 - Pijin Deuterocanon

Evri gud samting wea Waes Toktok save givim

¹ San, herem toktok blong mi, tingim evrisamting mi talem.

² Herem evri waes toktok ya, an traehad fo garem save.

³ Kolaot go long waes man fo garem save, an askem hem fo mekem yu save long olketa samting.

⁴ Traehad fo lukaotem waes, olsem yu traehad fo lukaotem seleni.

⁵ Sapos yu traehad olsem, bae yu save hao fo tinghae long Yawe, an garem save long God.

⁶ Yawe nomoa hemi mekem yu waes, an toktok blong hem hemi givim save long yu.

⁷ Hemi helpem stret pipol fo kamap waes, an hemi gadem pipol hu falom wanem hemi tru.

⁸ Hemi lukaftarem olketa hu i falom stretfala wei, an hemi gadem olketa hu i tinghevi long hem.

⁹ Lisin long mi, an bae yu save wanem hemi gud an stret, an wanem hemi stret fo duim.

¹⁰ Ya, bae yu kamap waes, an save blong yu bae mekem yu hapi.

¹¹ Gudfala tingting, hemi save lukaftarem yu, an wei fo save mining blong olketa samting, hemi save helpem yu.

¹² Ya, waes hemi save sevem yu from olketa ravis pipol, an from pipol hu save toknogud.

¹³ Pipol olsem i lus finis, an stap nao long tudak.

¹⁴ Olketa ya i hapi long evri ravis samting, an falom olketa ravis wei.

¹⁵ Pipol olsem i laea tumas, yu no save trastem.

¹⁶ Lisin long mi, an bae yu sef from suit toktok blong nogud woman.

¹⁷ Hemi lusim finis hasban blong hem, an fogetem finis promis long God.

¹⁸ Haos blong woman ya hemi ples fo dae, go long hem an bae yu dae.

¹⁹ No eniwan hu hemi go long nogud woman ya, hemi save kambaek. Hemi no save kambaek long wei fo garem laef.

²⁰ Falom wei blong gud man, an bae yu go long stretfala rod.

²¹ Stretfala pipol wea yu save trastem, olketa nao bae save stap gud long ples blong olketa olowe.

²² Bat bae God hemi aotem an torowem olketa ravis pipol an evri nogud man from ples blong olketa.