Provebs 16 - Pijin Deuterocanon

¹ Haat blong man save mekem plan. Yawe nomoa save talem hem oraet.

² Maet man hemi tingim wei blong hem i barava gud nomoa, bat Yawe hemi skelem wanem hemi laekem.

³ Trastem Yawe long evri waka blong yu, bae hemi gohed gudfala.

⁴ Yawe hemi mekem evrisamting fitim plan blong hem. An man nogud tu, Yawe hemi mekem fo panisim hem.

⁵ Yawe hemi les long olketa hu i praod tumas. Yu save, bae hemi panisim olketa.

⁶ Tinghevi long God, an falom hem olowe, an hem bae tekemaot sin blong yu. Tinghae long hem, an bae yu no save go kolsap long wei nogud.

⁷ Taem wei blong man hemi mekem Yawe hapi, Yawe hemi mekem enemi blong man fo kamap fren long hem.

⁸ Stretfala man wetem lelebet seleni, hemi lake moa winim ravis man wetem staka seleni.

⁹ Haat blong man save planem wei blong hem, bat Yawe nao hem mekem rod.

¹⁰ Toktok blong lida, hemi garem paoa, so hemi mas tok stret nomoa.

¹¹ Evri stretfala skel i blong Yawe, bikos hem nao mekem stretfala wei fo skelem evrisamting.

¹² Olketa lida mas les long wei nogud, bikos stretfala wei nomoa save mekem gavman strong.

¹³ Olketa lida i hapi long tru toktok, an olketa laekem tumas man hemi toktru.

¹⁴ Taem lida hemi kros, hem save kilim man dae. Waes man hemi traehad fo mekem lida hapi.

¹⁵ Taem lida hemi hapi, pipol garem laef. Hemi olsem ren wea hemi mekem gaden i grou.

¹⁶ Gol hemi gud, waes hemi moabeta. Silva hemi gud, save hemi moabeta.

¹⁷ Rod blong gudfala man, hemi no go kolsap long olketa ravis wei. Man hemi lukluk gud long rod, hemi save sevem laef blong hem.

¹⁸ Praod fastaem, bagarap bihaen. Bikhed fastaem, foldaon bihaen.

¹⁹ Hambol man wetem pua pipol, hemi moabeta winim man garem plande samting wetem pipol hu i strong tumas.

²⁰ Man hemi lisingud, bae laef blong hem hemi gud. Man hemi trastem Yawe, bae hemi hapi.

²¹ Man wea hemi waes, pipol save hemi garem gud tingting. Gudfala toktok mekem plande pipol fo save moa.

²² Gudfala save, hemi mekem laef hemi kamap. Bat krangge tingting, hemi mekem panis kamap nomoa.

²³ Haat blong waes man hemi lidim toktok blong hem, an hemi save tanem tingting blong nara man

²⁴ Toktok wea hemi barava kaen, hemi olsem hani. Yu kaikaim, hemi suit an mekem yu filstrong.

²⁵ Wanfala man hemi tingse rod hemi laekem i gud nomoa, bat hemi rod blong dae.

²⁶ Hanggre save mekem man hemi waka. Hemi nidim kaikai, dastawe hem waka.

²⁷ Man nogud laek fo mekem trabol toktok blong hem i olsem faea.

²⁸ Ravis man hemi mekem raoa kamap, Man hemi toksmol, hemi mekem olketa fren brekaot.

²⁹ Man fo faet, hemi os-os long wantok, hemi mekem hem go long rod wea i no stret.

³⁰ Man hemi satae, hemi planem ravis samting. Man hemi tok haed, hemi laekem samting nogud.

³¹ Waetfala hea blong olo, hemi olsem trufala biknem. Yu save kasem hem long stretfala laef.

³² Man hemi no kros kuiktaem, hemi strong winim nambawan soldia. Man save kontrolem kros blong hem, hemi strong winim man hu hemi save kontrolem wanfala taon long faet.

³³ Man hemi trae faendemaot wanem fo duim, Yawe nomoa hemi mekem ansa kamaot.