Provebs 11 - Pijin Deuterocanon

¹ Yawe les long raverave skel, stretfala skel, hemi hapi long hem.

² Man hemi praod, bae sem fogud, man hemi hambol, nao hemi waes.

³ Stretfala wei blong gud man hemi lidim hem, ravis wei spoelem man fo laea.

⁴ Taem Yawe jajem man, seleni hemi yusles, stretfala wei save sevem laef.

⁵ Stretfala wei blong barava gudfala man, hem nao stretem wei fo hem. Ravis wei blong ravis man, hem nao mekem hem foldaon.

⁶ Stretfala wei blong stretfala man, hem nao sevem laef blong hem, bat konman pas long ravis tingting blong hem.

⁷ Taem nogud man hemi dae, laek blong hem hemi lus, an evri hadwaka blong hem, hemi yusles.

⁸ Stretfala man hemi sef from trabol, bat trabol kasem nogud man.

⁹ Tok blong man hu i no tinghevi long God, hemi spoelem wantok blong hem, bat gudfala tingting save sevem stretfala man.

¹⁰ Taem stretfala man hemi hapi, evriwan i hapi, taem ravis man hemi lus, olketa hapi an singaot.

¹¹ Taem Yawe blesim gudfala pipol, taon blong olketa hemi garem biknem. Bat toktok blong ravis pipol hemi spoelem taon blong olketa.

¹² Krangge man, tokspoelem pipol, man hemi garem save, hemi stap kuaet.

¹³ Yu no trastem man hu hemi stori olobaot, man hemi stap kuaet yu save trastem.

¹⁴ No herem advaes, kantri bae foldaon, herem plande advaes, bae stanap strong.

¹⁵ Promis fo sensim kaon blong nara man, bae yu safa, no promis olsem an bae yu sef.

¹⁶ Pipol tinghae long kaenfala woman, man mas wakahad fo kamap ris.

¹⁷ Yu kaen long man, bae hemi kaen long yu, yu spoelem man, bae hemi spoelem yu.

¹⁸ Duim wanem hemi rong, bae yu tekem ravis pei, duim wanem hemi stret, olketa bae givim gud samting long yu,

¹⁹ Barava stretfala wei, hemi givim yu laef, ravis wei, hemi kilim yu dae.

²⁰ Yawe hemi les long man hemi garem ravis tingting long haat, bat hemi lavem stretfala man.

²¹ Yu save, ravis man nao bae hemi panis, stretfala man nao bae hemi fri.

²² Naesbola woman hu hemi nating garem gud tingting, hemi olsem dog wetem gol sen long nek.

²³ Stretfala man laekem nomoa wanem hemi gud. Ravis man laekem nomoa wanem hemi mekem pipol kros.

²⁴ Givimaot fri long pipol, bae yu ris, kipim nomoa wanem yu mas givim, bae yu pua.

²⁵ Man givim plande samting, bae hem garem plande moa. Yu givim kapa wata, bae olketa givim kap wata long yu.

²⁶ Salem kaikai long gridi praes, bae olketa toknogud long yu. Salem kaikai long gud praes, bae olketa tokhapi long yu.

²⁷ Lukaotem gudfala wei, bae yu faendem, lukaotem ravis wei, bae yu faendem tu.

²⁸ Man trastem seleni nomoa, hemi olsem dae lif, laef blong stretfala man, hemi olsem grinfala lif.

²⁹ Mekem trabol fo kasem famili blong yu, bae yu lusim evrisamting, Man no garem save, bae hemi wakaman blong waes man nomoa.

³⁰ Wei blong gudfala man hemi mekem laef kamap. Wei blong waes man hemi mekem pipol i garem laef.

³¹ Olsem stretfala pipol garem pei fitim olketa, ravis pipol tu bae garem pei fitim olketa.