Provebs 1 - Pijin Deuterocanon

Olketa waes toktok wea hemi save helpem yumi

¹ Olketa waes toktok blong King Solomon long Israel, hu hemi san blong King Deved, hem nao i stap insaet long disfala buk.

² Olketa toktok ya save mekem yumi kamap waes, mekem yumi falom olketa gudfala tingting, an fo minim gudfala olketa toktok wea hemi garem barava dip mining.

³ Olketa toktok ya save tisim yumi fo falom waes tingting, fo duim wanem hemi stret, an jaj long stretfala wei, an fo tritim evri pipol long sem wei.

⁴ Toktok ya save openem tingting blong pipol hu i no garem save, an save mekem yangfala pipol kamap waes an garem gud tingting.

⁵ Letem waes man kamap waes moa, an save lidim man wea skul gud,

⁶ fo save long mining blong olketa waes toktok an save givim ansa long kuestin blong waesman.

⁷ Stat blong save nao, yu tinghae long Yawe. Bat krangge pipol les long waes toktok an nating falom gudfala advaes.

Toktok fo helpem olketa yang pipol

⁸ San, lisin gudfala long evri toktok wea dadi hemi talem, an no fogetem evri tising wea mami hemi givim.

⁹ Olketa tising ya bae helpem yu, mekem laef blong yu kamap gud moa, olsem barava spesol hat long hed blong yu, o naes nekles long nek blong yu.

¹⁰ San blong mi, yu no falom suit toktok blong nogud pipol.

¹¹ Maet olketa sei, “Kam. Yumi haed long saet rod, an kilim dae olketa gud pipol fo plei nomoa.

¹² Nomata olketa stap gud distaem, bae yumi sendem olketa go long grev.

¹³ Bae yumi tekem enikaen gud samting, fo fulumapem evri haos blong yumi.

¹⁴ Kam joenem mifala, bae yumi divaedem evrisamting yumi stilim.”

¹⁵ San, stap farawe from pipol olsem, no go wetem olketa.

¹⁶ Olketa redi nomoa fo duim eni ravis samting. Olketa redi nomoa fo kilim eniwan dae.

¹⁷ Hemi krangge fo mekem trap fo kasem bed taem bed i lukluk nomoa, bat wea,

¹⁸ pipol olsem i mekem trap fo olketa seleva, olketa seleva nomoa bae dae long hem.

¹⁹ Man hemi mekem nara man dae fo kasem olketa samting blong hem, bae hem kasem dae nomoa.

No les long Waes Toktok

²⁰ !Yufala lisin! Waes Toktok hemi kolaot long bik rod, an long olketa maket.

²¹ Hemi kolaot long olketa geit long taon, an long evri ples wea pipol i hipap long hem.

²² Hemi tok olsem, “?Yufala hu i no garem save, hao long nao bae yufala stap olsem? ?Hao long nao bae yufala krangge man i hapi fo mekfan long pipol? ?Hao long nao yufala gohed fo les long save?

²³ Lisin kam taem mi stretem yufala. Bae mi advaesim yufala, an mekem yufala savegud long toktok blong mi.

²⁴ Mi bin gohed fo kolem yufala, bat yufala nating save lisin. Mi askem yufala fo kam, bat yufala les.

²⁵ Yufala les long evri advaes blong mi, an no wiling fo mi stretem yufala.

²⁶ So taem trabol hemi kasem yufala, bae mi laf an mekfan long yufala.

²⁷ Taem trabol hemi kasem yufala olsem bikfala komburu, an yufala filnogud tumas, bae mi gohed laf an mekfan nomoa long yufala.

²⁸ Bae yufala kolem mi, bat mi no herem. Bae yufala lukaotem mi, bat yufala no faendem mi.

²⁹ Yufala les fo garem save, an yufala les fo tinghae long Yawe.

³⁰ Taem mi wande stretem yufala, yufala les long advaes blong mi.

³¹ So bae yufala kaikaim frut blong ravis wei blong yufala, an bae yufala fulap tumas long hem gogo yufala sik.

³² Olketa hu i no garem save bae i dae bikos olketa tanem baeksaet long mi. An krangge pipol bae dae bikos i les long stretfala wei.

³³ Bat olketa hu i lisin long mi, bae olketa stap gud olowe. Ya, bae olketa no fraetem enisamting.”