Nambas 33 - Pijin Deuterocanon

Gogo blong Pipol blong Israel stat kam long Ijip go kasem Moab

^1-2 Hem nao stori blong gogo blong pipol blong Israel. Taem pipol blong Israel i lusim Ijip, olketa wakabaot kam falom olketa traeb blong olketa. Nao Mosis an Haeprist Eron, tufala lidim olketa go. An Yawe hemi talem Mosis fo raetemdaon nem blong olketa ples wea olketa stap long gogo ya. An olketa ples wea olketa bin stap kam long olketa, hemi olsem:

³ Olketa lusim Ijip long mekfiftin de blong long fas mans blong yia. Datfala de nao hemi bihaen long fas Fist blong Pasova. An olketa barava praod tumas taem olketa lusim taon long Rameses long ae blong olketa pipol blong Ijip.

⁴ Long datfala taem, olketa pipol blong Ijip i gohed fo berem olketa fasbon pikinini boe blong olketa wea Yawe hemi bin kilim olketa dae fo panisim olketa god blong olketa pipol blong Ijip.

⁵ Afta olketa lusim Rameses, olketa stap kam long Sukot.

⁶ Afta olketa lusim Sukot, olketa stap kam long Etam wea hemi saet kam long drae eria.

⁷ Afta olketa lusim Etam, olketa tane gobaek long Pihahirot, an long dea nao olketa stap kam kolsap long Migdol, long ist saet blong Baal-Sefon.

⁸ Afta olketa lusim Pihahirot long Migdol, olketa krosim Red Si an go insaet long drae eria. Olketa wakabaot fo trifala de, an olketa stap kam long Mara.

⁹ Afta olketa lusim Mara, olketa stap kam long Elim. Ples ya hemi garem tuelfala springwata an seventi pam tri.

¹⁰ Afta olketa lusim Elim, olketa stap kam long saet long Red Si.

¹¹ Afta olketa lusim Red Si, olketa stap kam long drae eria long Sini.

¹² Afta olketa lusim Sin, olketa stap kam long Dofka.

¹³ Afta olketa lusim Dofka, olketa stap kam long Alus.

¹⁴ Afta olketa lusim Alus, olketa stap kam long Refidim. Ples ya hemi nating garem wata fo olketa dringim.

¹⁵ Afta olketa lusim Refidim, olketa stap kam long drae eria long Saenae.

¹⁶ Afta olketa lusim Saenae, olketa stap kam long Kibrot-Hatava.

¹⁷ Afta olketa lusim Kibrot-Hatava, olketa stap kam long Haserot.

¹⁸ Afta olketa lusim Haserot, olketa stap kam long Ritma.

¹⁹ Afta olketa lusim Ritma, olketa stap kam long Rimon-Peres.

²⁰ Afta olketa lusim Rimon-Peres, olketa stap kam long Libna.

²¹ Afta olketa lusim Libna, olketa stap kam long Risa.

²² Afta olketa lusim Risa, olketa stap kam long Kehelata.

²³ Afta olketa lusim Kehelata, olketa stap kam long maonten long Sefa.

²⁴ Afta olketa lusim maonten long Sefa, olketa stap kam long Harada.

²⁵ Afta olketa lusim Harada, olketa stap kam long Makelot.

²⁶ Afta olketa lusim Makelot, olketa stap kam long Tahat.

²⁷ Afta olketa lusim Tahat, olketa stap kam long Tera.

²⁸ Afta olketa lusim Tera, olketa stap kam long Mitka.

²⁹ Afta olketa lusim Mitka, olketa stap kam long Hasmona.

³⁰ Afta olketa lusim Hasmona, olketa stap kam long Moserot.

³¹ Afta olketa lusim Moserot, olketa stap kam long Bene-Jaakan.

³² Afta olketa lusim Bene-Jaakan, olketa stap kam long Hoa-Hagidgad.

³³ Afta olketa lusim Hoa-Hagidgad, olketa stap kam long Jotbata.

³⁴ Afta olketa lusim Jotbata, olketa stap kam long Abrona.

³⁵ Afta olketa lusim Abrona, olketa stap kam long Esion-Geba.

³⁶ Afta olketa lusim Esion-Geba, olketa stap kam long drae eria long Sini, long Kades.

³⁷ Afta olketa lusim Sini, long Kades, olketa stap kam long maonten long Hoa, long baondri blong olketa pipol long Idom.

³⁸ An long mekfoti yia bihaen long taem wea olketa lusim Ijip, long mekfaev mans blong datfala yia, long fas de blong hem, Yawe hemi talem Haeprist Eron fo go antap long maonten ya. An taem hemi go kasem antap, hemi dae long dea.

³⁹ Long datfala taem ya, hemi kasem 123 yia.

⁴⁰ Long datfala taem, Paramaon Sif blong Arad long Kenan long saot, hemi herem nius olsem wea olketa kam nao.

⁴¹ Afta olketa lusim maonten long Hoa, olketa stap kam long Salmona.

⁴² Afta olketa lusim Salmona, olketa stap kam long Punon.

⁴³ Afta olketa lusim Punon, olketa stap kam long Obot.

⁴⁴ Afta olketa lusim Obot, olketa stap kam long Yie-Abarim long eria blong pipol blong Moab.

⁴⁵ Afta olketa lusim Yie-Abarim, olketa stap kam long Dibon-Gad.

⁴⁶ Afta olketa lusim Dibon-Gad, olketa stap kam long Almon-Diblataem.

⁴⁷ Afta olketa lusim Almon-Diblataem, olketa stap kam long olketa maonten long Abarim, long saet blong maonten long Nebo.

⁴⁸ Afta olketa lusim olketa maonten long Abarim, olketa stap kam long bikfala flat ples blong Moab, long saet blong Jodan Riva long ist, long narasaet long riva from Jeriko.

⁴⁹ Long dea, ples blong olketa hemi long midol long tufala ples olsem, Bet-Jesimot long saot, an Akesia long not.

Mosis hemi talemaot toktok blong Yawe long olketa pipol blong Israel

⁵⁰ Taem olketa stap long bikfala flat ples blong Moab, long saet blong Jodan Riva long ist, long narasaet long riva from Jeriko, Yawe hemi tok olsem long Mosis,

⁵¹ “Talem pipol blong Israel wea taem yufala krosim Jodan Riva fo go long lan blong Kenan,

⁵² bae yufala mas ronemaot olketa pipol wea i stap long dea. An yufala mas spoelem tambu kaving long ston o long aean blong olketa, an yufala mas spoelem olketa tambuples blong olketa.

⁵³ Yufala mas tekova long lan ya, an stap kam long hem, bikos mi givim finis long yufala fo yufala onam.

⁵⁴ Bae yufala mas divaedem olketa lan ya go long olketa traeb blong yufala, falom namba blong olketa. Bikfala lan hemi mas go long bikfala traeb, an smolfala lan hemi mas go long smolfala traeb. An yufala mas yusim tufala spesol ston fo divaedem olketa lan ya, an long wei wea tufala ston i foldaon hem nao wei wea evri traeb save garem lan blong hem.

⁵⁵ Bat sapos yufala nating ronemaot evriwan from lan ya, bae olketa mekem tumas trabol fo yufala. Bae olketa olsem smolfala stik wea hemi sap tumas wea hemi save kasem ae blong yufala. O bae olketa olsem nila long busis wea hemi save kasem bodi blong yufala. Oltaem bae olketa gohed fo mektrabol long yufala.

⁵⁶ An sapos yufala no ronemaot olketa, bae mi spoelem yufala olsem wea mi bin planem fastaem fo spoelem olketa.”