Nambas 13 - Pijin Deuterocanon

Tuelfala man i go fo lukluk long Kenan an faendemaot abaotem ples

^1-3 Long taem wea olketa stap yet long drae eria long Paran, Yawe hemi tok olsem long Mosis, “Yu mas siusim tuelfala lida, wan from evri traeb blong yufala. Yu mas sendem tuelfala go long Kenan fo lukluk an faendemaot abaotem lan wea mi promisim finis fo givim long yufala.” So hemi duim olsem wea Yawe hemi bin talem, hemi siusim tuelfala lida an hemi sendem olketa go fo lukluk an faendemaot abaotem datfala lan.

⁴ Olketa lida wea hemi sendemaot, nem blong olketa nao hemi olsem: Long traeb blong Ruben, hemi siusim Samua, san blong Sakua.

⁵ An long traeb blong Simion, hemi siusim Safat, san blong Hori.

⁶ An long traeb blong Jiuda, hemi siusim Kelab, san blong Jefune.

⁷ An long traeb blong Isaka, hemi siusim Igal, san blong Josef.

⁸ An long traeb blong Efrem, hemi siusim Hosea, san blong Nun.

⁹ An long traeb blong Benjamin, hemi siusim Palti, san blong Rafu.

¹⁰ An long traeb blong Sebulun, hemi siusim Gadiel, san blong Sodi.

¹¹ An long traeb blong Josef wea olketa kolem traeb blong Manase, hemi siusim Gadi, san blong Susi.

¹² An long traeb blong Dan, hemi siusim Amiel, san blong Gemali.

¹³ An long traeb blong Asa, hemi siusim Setua, san blong Mikael.

¹⁴ An long traeb blong Naftali, hemi siusim Nabi, san blong Vofsi.

¹⁵ An long traeb blong Gad, hemi siusim Guel, san blong Maki.

¹⁶ Hem nao tuelfala man wea Mosis sendem fo lukluk long lan long Kenan. An long datfala taem, hemi sensim nem blong Hosea san blong Nun, hemi kolem hem Josua.

¹⁷ Taem hemi sendem olketa, hemi tok olsem, “Yufala mas gotru long drae eria long saot long Kenan an yufala mas wakabaot go olowe go long not, go kasem olketa maonten.

¹⁸ Yufala mas faendemaot abaotem datfala ples. ?Haomas pipol nao i stap long hem? ?Waswe, olketa pipol i strong o nomoa?

¹⁹ ?Waswe, ples ya hemi gud o hemi nogud? ?Waswe, olketa taon i garem wolston raonem o nomoa?

²⁰ Bae yufala mas faendemaot tu abaotem graon. ?Waswe, hemi gud fo plantem kaikai o hemi nogud? ?Waswe, hemi garem plande tri o nomoa? An taem yufala kambaek, bae yufala mas karim kam samfala frut from datfala ples.” Hemi tok olsem, bikos long datfala taem, olketa frut blong grep i stat fo raep.

²¹ So tuelfala ya i go nao fo lukluk long datfala lan. Olketa stat long drae eria long Sini long saot, an wakabaot go kasem ples long Rehob, kolsap long eria long Lebo-Hamat wea hemi not long Kenan.

²² Fastaem olketa go fo lukluk long haf blong lan long saot, an kasem taon long Hebron. Hebron hemi ples blong olketa long laen blong Ahiman, an laen blong Sesae, an laen blong Talmae. Olketa pipol blong Hebron ya i long laen blong Anak. Taon long Hebron hemi barava olfala fogud. Taon long Soan long Ijip hemi wanfala olfala ples, bat Hebron hemi sevenfala yia olfala moa winim Soan.

²³ Olketa lida ya i kasem Eskol Vali. Long dea olketa katem wanfala bans frut blong grep wea hemi garem plande grep long hem. Bans grep ya hemi hevi tumas, an tufala man nao i karim long wanfala stik. An olketa tekem samfala frut blong pomegranet wetem samfala frut blong fig tu.

²⁴ Olketa kolem vali ya, Eskol Vali, wea hemi minim olsem “Bans”, from bikfala bans grep wea olketa katemaot long dea.

²⁵ Long datfala taem, olketa stap fotifala de long Kenan. Olketa wakabaot fo lukluk mekem olketa savegud long olketa ples, an bihaen olketa kambaek.

²⁶ Olketa kam long ples long Kades long drae eria long Paran wea Mosis an Eron an olketa pipol blong Israel i stap long hem. Olketa talemaot evrisamting wea olketa lukim, an som tu olketa frut wea olketa karim kam.

²⁷ An olketa sei, “!Lukim disfala frut ya! Mifala faendemaot wea graon blong lan hemi gudfala tumas, an oltaem hemi garem kaikai long hem.

²⁸ Bat olketa pipol blong datfala ples i strong tumas, an taon blong olketa bikfala tumas, an i garem bikfala wolston raonem. An mifala lukim olketa long laen blong Anak.

²⁹ An mifala lukim dat olketa long laen blong Amalek i stap long saet long saot, an olketa long laen blong Het, wetem laen blong Jebus an laen blong Amoa olketa stap long ples blong maonten, an olketa long laen blong Kenan i stap long saet blong si an long saet blong Jodan Riva.”

³⁰ Bat Kelab hemi mekem olketa hu i hipap wetem Mosis fo kuaet, an hemi tok olsem, “Hemi moabeta fo yumi go kilim olketa distaem, an tekova long lan ya. !Yumi strong ya! !Yumi fit nomoa fo winim olketa!”

³¹ Bat olketa narafala man hu i bin go wetem hem i tok olsem, “!Nomoa! !Yumi no fit fo go kilim olketa! !Olketa pipol ya i strong winim yumi!”

^32-33 Den olketa mekem ravis ripot olsem, “!Long datfala lan trabol bae kasem evriwan wea i stap long hem. An olketa pipol wea mifala lukim, olketa evriwan i barava tolfala fogud. An mifala lukim olketa jaean tu long laen blong Anak. Taem mifala lukim olketa, mifala smol tumas olsem anis nomoa, an olketa tu i lukim mifala olsem.” An toktok ya hemi goraon, go kasem olketa pipol.