Josua 18 - Pijin Deuterocanon

Josua hemi divaedem olketa lan wea hemi stap yet fo olketa narafala traeb blong Israel

¹ Bihaen long taem wea pipol blong Israel i winim faet long olketa enemi long lan, olketa kam tugeta long Saelo an putumap Tambu Haostent blong Yawe long ples ya.

² Long datfala taem, sevenfala traeb blong olketa nao i no onam eni lan yet.

³ So Josua hemi tok olsem long olketa, “?Hao long nao bae yufala gohed fo weit? Yawe hu hemi God blong olketa grani blong yumi bifoa hemi makem finis olketa lan ya fo yumi. Yufala mas go an tekova nao long lan ya fo yufala.

⁴ Siusim trifala man from evri traeb blong yufala. Bae mi sendem olketa fo goaot an lukim lan ya, mekem olketa makemaot olketa eria long lan mekem olketa traeb blong yufala bae i onam. An bihaen, olketa mas kambaek long mi.

^5-6 Bae olketa mas divaedem lan ya long sevenfala eria. An olketa mas raetemdaon ripot abaotem olketa spialaen long olketa eria ya, an mas tekem kambaek olketa ripot ya long mi. Bae mi rolem olketa spesol ston fo somaot dat olketa lan ya, Yawe hu hemi God blong yumi nao hemi givim long olketa traeb blong yufala. Bat olketa long traeb blong Jiuda bae i stap finis long eria long saot. An olketa long traeb blong Josef bae i stap finis long tufala eria long not wea i no insaet long eria blong olketa sevenfala wea yufala divaedem distaem.

⁷ Olketa long traeb blong Livae bae i no garem eni lan olsem olketa narafala traeb, bikos olketa waka olsem prist blong Yawe, an disfala waka blong olketa ya nao hemi olsem lan wea God hemi givim long olketa. Olketa long traeb blong Gad, an long traeb blong Ruben, an long narafala haf long traeb blong Manase i garem finis lan long ist saet long Jodan Riva. Hem nao lan wea Mosis, wakaman blong Yawe, hemi bin givim long olketa bifoa.”

⁸ Olketa man ya i go nao fo makem olketa lan olsem wea Josua bin talem long olketa.

⁹ Olketa wakabaot go long evri ples long lan ya, an olketa raetemdaon evrisamting abaotem hao olketa divaedem lan ya long sevenfala eria wetem olketa taon wea i stap insaet long olketa eria ya. Taem olketa makem finis olketa ples ya, olketa gobaek long Josua long Saelo.

¹⁰ Den long frant long Yawe, Josua hemi rolem olketa spesol ston fo somaot eria wea Yawe bae hemi givim long olketa traeb fo onam. Hem nao wei wea Josua hemi divaedem olketa eria go long sevenfala traeb wea i no onam yet eni lan.

Lan blong traeb blong Benjamin

¹¹ Taem Josua hemi divaedem olketa lan ya, fas haf long lan hemi go fo traeb blong Benjamin. Eria blong olketa nao hemi stap long midol long eria blong traeb blong Jiuda an eria blong traeb blong Efrem.

¹² Spialaen long eria ya hemi stat long Jodan Riva, an hemi go narasaet antap long hil long not saet long Jeriko, an hemi tane go moa antap long olketa hil eria long west go-go kasem drae eria long Bet-Aven.

¹³ Spialaen ya hemi go long saot saet long hil kolsap long taon long Lus wea narafala nem blong taon ya nao Betel. An spialaen ya hemi godaon moa long Atarot wea hemi gopas long narasaet long bikfala hil long Bet-Horon long daon.

¹⁴ Spialaen long west saet hemi stat long ples ya, an hemi goraon long saot long bikfala hil ya go-go kasem taon long Kiriat-Baal wea narafala nem blong hem nao Kiriat-Jearim, long eria blong olketa long traeb blong Jiuda. Hem nao spialaen blong eria ya long west saet.

¹⁵ An spialaen blong hem long saot hemi stat saet long taon long Kiriat-Jearim long west go-go kasem springwata long Neftoa.

¹⁶ An hemi godaon kasem botom long maonten long not long Refaem vali wea disfala Hinom vali hemi stat. Spialaen ya hemi falom Hinom vali an hemi go pas long narasaet long taon long Jebus an hemi go kasem springwata long En-Rogel.

¹⁷ Spialaen ya hemi tane go long not fo go kasem springwata long En-Semes, an hemi go moa kasem Gelilot long saet long ples ya fo godaon wea olketa kolem Adumim wea rod hemi gotru midol long olketa hil. Spialaen ya hemi godaon moa go-go kasem Ston blong Bohan. Bohan ya, hemi nem blong wanfala san blong Ruben.

¹⁸ Spialaen ya hemi goap moa fo bikfala hil long Bet-Araba long not wea yu save luk godaon long Jodan vali,

¹⁹ an hemi gohed fo goraon saet kam long hil long Bet-Hogla. Spialaen ya hemi en long Ded Si long ples wea Jodan Riva hemi en long hem. Hem nao spialaen blong disfala lan long saet long saot.

²⁰ An spialaen blong hem long ist nao long Jodan Riva. Hem nao spialaen long lan wea traeb blong Benjamin i onam.

²¹ Nem long olketa taon blong olketa famili long traeb blong Benjamin nao Jeriko, an Bet-Hogla, an Emek-Kesis,

²² an Bet-Araba, an Semaraem, an Betel,

²³ an Avim, an Para, an Ofra,

²⁴ an Kefaramoni, an Ofni an Geba. Hem nao tuelfala taon wea i stap long eria ya wetem olketa vilij wea i stap raon long olketa.

²⁵ An olketa garem samfala narafala taon moa wea nem blong olketa nao, Gibeon, an Rama, an Beerot,

²⁶ an Mispa, an Kefira, an Mosa,

²⁷ an Rekem, an Irpeel, an Tarala,

²⁸ an Sela, an Haelef, an Jebus wea narafala nem blong hem nao Jerusalem, an Gibea an Kiriat-Jearim. Hem nao fotinfala taon wea i stap long eria ya wetem olketa vilij wea i stap raon long olketa. Hem nao olketa lan wea traeb blong Benjamin i onam.