Josua 12 - Pijin Deuterocanon

Tufala paramaon sif wea Mosis bin winim long faet

¹ Bifoa kam, Mosis nao hemi bin lidim olketa Israel pipol fo faet an winim tufala paramaon sif long ist saet long Jodan Riva long faet an tekova long lan blong olketa. Spialaen long lan blong tufala paramaon sif ya, hemi stat long vali long Anon an goap long Jodan Riva an go olowe go-go kasem maonten long Hemon long not.

² Wanfala long tufala paramaon sif ya nao Sif Sihon. Hemi paramaon sif long laen blong Amoa long taon long Hesbon. Sif Sihon hemi rul ovarem saot haf long eria long Gilead. Spialaen blong eria blong hem long saot hemi disfala Anon Riva. Spialaen blong hem long ist hemi stat long taon long Aroa long ist long Anon vali an go kasem disfala Jabok riva, an hemi makemaot eria blong laen blong Amon long ist. Spialaen blong hem long not hemi disfala Jabok Riva an vali long Jodan riva tu.

³ Spialaen blong hem long west hemi stat long not long Leik Galili an hemi ka-kam long vali long Jodan Riva go kasem Ded Si long saot. An taon long Bet-Jesimot an maonten long Pisga i insaet long eria blong Sihon.

⁴ An narawan nao Sif Og, wea hemi paramaon sif blong eria long Basan. Paramaon sif ya hemi laswan long olketa Refaem pipol an hemi rul ovarem tufala taon long Astarot an Edrei.

⁵ Eria blong hem hemi stat long maonten long Hemon long not, go-go kasem taon long Saleka long ist. Hemi rul ovarem tu evri lan long Basan, nao lan long Basan long saet long west, hemi kasem spialaen blong eria long Gesua an Maaka. An hemi rul ovarem wanfala haf long eria long Gilead long not go-go kasem eria blong Sif Sihon blong Hesbon long saot.

⁶ Mosis hu hemi wakaman blong Yawe wetem olketa man blong hem nao i winim tufala paramaon sif ya long faet. Bihaen, hemi givim olketa lan ya go long traeb blong Ruben, an long traeb blong Gad, an long haf long traeb blong Manase, an olketa gohed fo onam olketa lan ya nao.

Olketa paramaon sif wea Josua bin winim long faet

⁷ Josua wetem olketa ami blong hem i winim evri paramaon sif, stat long taon long Balgad long vali long Lebanon long not go-go kasem maonten long Halak long saot wea hemi kolsap long eria long Idom. Bihaen, Josua hemi divaedem olketa lan ya go long olketa traeb blong Israel.

⁸ Lan wea Josua hemi divaedem long olketa, hemi stat long olketa lan long olketa hil go-go kasem olketa smolfala hil saet long west, an hemi go moa kasem Jodan Riva long ist, an hemi go-go kasem olketa drae eria long saot. Bifoa, olketa lan ya i blong olketa laen blong Het, an olketa laen blong Amoa, an laen blong Kenan, an olketa laen blong Peres, an olketa laen blong Hivi, an olketa laen blong Jebus. Bat long taem ya, Josua wetem olketa pipol blong Israel i tekova long olketa lan ya nao.

^9-24 Josua an ami blong hem i winim olketa paramaon sif blong olketa taon olsem: Jeriko an Ai wea i kolsap long Betel, an Jerusalem, an Hebron, an Jamut, an Lakis, an Eglon, an Gesa, an Debia, an Geda, an Homa, an Arad, an Libna, an Adulam, an Makeda, an Betel, an Tapua, an Hefa, an Afek, an Lasaron, an Madon, an Hasoa, an Simron Meiron, an Aksaf, an Taanak, an Megido, an Kedes an Jokneam wea i kolsap long Kaamel, an Doa wea hemi kolsap long solwata, an Goeim long Galili, an Tiasa. Teti-wan paramaon sif nao, olketa kilim dae.