Gudnius abaotem Jisas Kraes wea Jon hemi raetem 13 - Pijin Deuterocanon

Jisas wasim lek blong olketa disaepol blong hem

¹ Distaem hemi kasem las de bifoa Fist blong Pasova. An Jisas hemi save nao dat hemi kasem taem fo hemi lusim disfala wol fo gobaek long Dadi blong hem moa. Jisas hemi lavem olowe olketa long disfala wol wea olketa falom hem, an hemi gohed fo lavem olketa go-go kasem taem hemi dae.

² Long taem olketa kaikai long ivining, Seitan hemi putum tingting insaet long maen blong Jiudas finis fo hemi mas givim Jisas go long han blong olketa enemi. Disfala Jiudas hemi san blong Saemon Iskariot.

³ Nao Jisas hemi save finis wea Dadi blong hem hemi givim evrisamting long han blong hem finis. An hemi save tu dat hemi kamaot long God, an bae hemi gobaek moa long God.

⁴ So Jisas hemi lusim tebol ya, an hemi tekemaot longfala kaleko blong hem an hemi tekem wanfala taol an taemap raonem hem seleva.

⁵ Hemi kapsaetem wata long wanfala dis an hemi stat fo wasim lek blong olketa disaepol blong hem nao. An hemi mekem olketa drae wetem disfala taol wea hemi taemap raonem hem.

⁶ Taem hemi kam long Saemon Pita, Pita hemi sei long hem olsem nao, “?Waswe Masta, bae yu wasim lek blong mi ya?”

⁷ Nao Jisas hemi ansarem hem olsem, “Long distaem, yu no save yet wanem mi duim long yufala ya, bat bihaen nao bae yu save.”

⁸ Nao Pita hemi tok long hem olsem, “!Bae yu nating save wasim lek blong mi ya! !Nomoa nao!” Jisas hemi sei long hem, “Sapos mi no wasim lek blong yu, yu no blong mi nao ya.”

⁹ Taem ya, Saemon Pita hemi sei long hem nao, “Oo Masta, yu no wasim lek blong mi nomoa, bat yu mas wasim olketa han an hed blong mi tu.”

¹⁰ Bat Jisas hemi sei long hem, “Man hu hemi suim an hemi klin finis, hemi no save wasim bodi blong hem moa ya. Lek blong hem nomoa hemi mas wasim. Yufala klin finis, bat no evriwan long yufala.”

¹¹ Jisas hemi save finis nao long man hu bae hemi givim hem go long han blong olketa enemi. Dastawe nao hemi sei no evriwan long olketa nao hemi klin ya.

¹² Taem Jisas hemi wasim lek blong olketa finis an hemi werem moa kaleko blong hem, hemi go an sidaon moa. An hemi sei long olketa disaepol blong hem olsem, “?Waswe, yufala save wanem mi bin duim long yufala?

¹³ Yufala kolem mi Tisa an Masta, an hemi gud fo yufala kolem mi olsem ya bikos hemi tru.

¹⁴ Nao sapos mi, wea mi Tisa an Masta blong yufala, mi wasim lek blong yufala, yufala tu i mas wasim lek blong olketa nara man long yufala.

¹⁵ Disfala samting wea mi duim long yufala ya, hemi fo som gudfala wei long yufala, mekem yufala save duim semsamting tu.

¹⁶ Mi talem yufala tru samting nao, no eni wakaman hemi hae winim bos blong hem ya, an no eni niusman hemi hae winim man hu hemi sendem hem go.

¹⁷ Yufala save nao long olketa samting ya, an bae yufala hapi tumas ya sapos yufala falom.

¹⁸ “I no evriwan long yufala nao mi tokabaotem, bikos mi savegud long yufala wea mi siusim finis ya. Bat disfala toktok blong Buktambu hemi mas kamtru, wea hemi sei, ‘Man hu hemi kaikai wetem mi, hemi spoelem mi moa.’

¹⁹ Mi talem long yufala distaem nao wanem bae hemi hapen, mekem taem hemi hapen bae yufala biliv wea ‘Mi nao Mi Stap Olowe’.

²⁰ Mi talem yufala tru samting nao, man hu hemi kaen tumas long eniwan wea mi sendem kam, hemi kaen tumas long mi tu ya. An eniwan hu hemi kaen tumas long mi, hemi kaen tumas long God hu hemi sendem mi kam tu.”

Jisas talemaot dat Jiudas bae givim hem go long olketa enemi

²¹ Taem Jisas hemi talem olketa samting ya finis, tingting blong hem hemi filsore tumas nao, an hemi tok olsem nao, “Mi talem yufala tru samting nao, bae wanfala long yufala hemi givim mi go long han blong olketa enemi blong mi.”

²² Long taem ya, olketa disaepol i lukluk long olketa seleva nao, bikos olketa barava no save hu nao Jisas hemi minim ya.

²³ Nao disfala disaepol wea Jisas hemi lavem tumas ya, hemi sidaon go kolsap long Jisas.

²⁴ So Saemon Pita hemi mekem go saen long disaepol ya, fo mekem hem askem Jisas abaotem hu nao hemi minim ya.

²⁵ So disfala disaepol hemi tane go long Jisas an hemi askem hem olsem. “?Masta, hu nao disfala man ya?”

²⁶ Nao Jisas hemi ansarem hem olsem, “Bae mi putum go lelebet bred insaet long supsup ya an bae mi givim go long man ya nao.” An Jisas hemi putum go lelebet bred ya insaet long supsup ya, an hemi givim go long Jiudas nao, san blong Saemon Iskariot.

²⁷ Taem Jiudas hemi tekem disfala bred ya, Seitan hemi go insaet long hem nao. An Jisas hemi tok olsem long Jiudas, “Yu duim kuiktaem wanem yu mas duim ya.”

²⁸ Olketa nara man hu i sidaon raonem tebol ya, olketa nating save waswe nao Jisas hemi tok go olsem long Jiudas.

²⁹ Jiudas, hemi man fo lukaftarem seleni blong olketa ya. So diswan hemi mekem samfala disaepol fo tingse Jisas hemi talem Jiudas fo go an baem samfala samting fo olketa yusim long olketa bikde ya, o fo hemi givim samfala samting long olketa pipol hu i pua.

³⁰ Taem Jiudas hemi tekem disfala bred ya finis nomoa, hemi goaot kuiktaem nao. An long taem ya, hemi naet finis nao.

Niufala lo

³¹ Taem Jiudas hemi goaot finis, Jisas hemi sei, “Long distaem, bae olketa mekhae long San Blong Man nao, an bae olketa mekhae long God tu bikos long hem ya.

³² An sapos olketa mekhae long God bikos long San Blong Man, bae God seleva tu hemi mekhae long hem ya. An bae hemi mekhae long hem long distaem nao.

³³ Yufala olketa pikinini blong mi, bae mi no stap longtaem wetem yufala ya. An olsem mi talem finis long olketa bikman blong olketa Jiu, mi talem long yufala tu, ‘Bae yufala lukaotem mi, bat bae yufala no save go long ples wea bae mi go long hem.’

³⁴ Mi givim niufala lo long yufala. Yufala mas lavem yufala evriwan. Mi lavem yufala, an long sem wei ya, yufala tu mas lavem yufala evriwan.

³⁵ Sapos yufala lavem yufala evriwan, bae evri pipol i luksave dat yufala nao olketa disaepol blong mi.”

Jisas talemaot dat Pita bae talem hemi nating save long hem

³⁶ Nao Pita hemi askem Jisas olsem, “?Masta, wea nao bae yu go long hem ya?” Jisas hemi ansarem hem olsem, “Distaem, yu no save falom mi go long ples wea bae mi go long hem, bat bae yu falom mi bihaen.”

³⁷ Pita hemi askem hem moa olsem, “?Masta, waswe nao mi no save falom yu distaem? !Mi redi nomoa fo dae fo helpem yu ya!”

³⁸ Jisas hemi ansarem hem olsem, “?Waswe, bae yu barava wiling fo dae fo helpem mi? Mi talem yu tru samting nao, long taem kokorako hemi no krae yet, bae trifala taem nao yu sei yu nating save long mi.”