Jeremaea 28 - Pijin Deuterocanon

Laea profesi blong Hananaea

¹ Long mekfaev mans blong mekfoa yia wea King Sedekaea hemi rul ovarem Jiuda, Profet Hananaea, san blong Asua, wea hemi man blong Gibeon, hemi kam toktok long Profet Jeremaea long Tambuhaos blong Yawe. Hemi stanap long ae blong olketa prist wetem olketa pipol, nao hemi tok olsem,

² “Yawe hu hemi garem evri paoa an hu hemi God blong Israel, hemi tok olsem: Bae mi brekem paoa blong King blong Babilonia.

³ Bifoa tufala yia hemi finis, evri gudfala samting blong Tambuhaos wea King Nebukadnesa bin tekem go long Babilonia, bae mi tekem kambaek moa long disfala ples.

⁴ An bae mi tekem kambaek tu King Jehoeakin, san blong King Jehoeakim blong Jiuda, wetem olketa pipol blong Jiuda ya wea olketa fosim fo lusim lan blong olketa an go long Babilonia. Ya, bae mi brekem paoa blong king ya blong Babilonia, olsem man hemi aotem diskaen pis timba from nek blong buluka. “Hem nao mesij blong Yawe.”

⁵ Nao Profet Jeremaea hemi stanap long ae blong olketa prist wetem olketa pipol ya hu i gohed fo stanap long Tambuhaos ya, an hemi tok olsem long Profet Hananaea,

⁶ “!Toktok ya hemi gud tumas ya! !Letem Yawe hemi duim barava olsem yu talem! Hemi gud sapos Yawe hemi mekem toktok ya blong yu hemi kamap olsem, an tekem kambaek olketa gudfala samting blong Tambuhaos wea i stap long Babilonia, wetem olketa pipol tu wea olketa fosim fo lusim lan blong olketa an go long datfala ples.

⁷ Bat lisin kam gudfala long olketa toktok wea bae mi talem long yu wetem olketa pipol ya.

⁸ From longtaem bifoa kam kasem tude, olketa profet bin gohed fo talemaot dat taem fo faet, an taem blong hanggre, an olketa bikfala sik, olketa mas kam kasem olketa pipol blong plande lan an kingdom.

⁹ Bat eni profet hu hemi gohed fo talemaot profesi abaotem taem blong piis, bae pipol save bilivim nomoa hemi barava profet wea Yawe hemi sendem, sapos olketa profesi hemi hapen barava olsem wea hemi talem.”

¹⁰ Nao Profet Hananaea hemi tekemaot pis timba wetem strap wea hemi stap long nek blong Profet Jeremaea, an hemi brekem,

¹¹ an hemi tok olsem long ae blong olketa pipol ya, “Yawe nao hemi tok olsem: Long wei ya nao, bifoa tufala yia hemi finis bae mi brekem paoa blong King Nebukadnesa ovarem evri kantri.” Taem Profet Hananaea hemi talemaot toktok ya finis, Profet Jeremaea hemi stanap, an hemi go.

¹² No long taem bihaen wea Profet Hananaea bin tekemaot pis timba wetem strap wea hemi stap long nek blong Profet Jeremaea, Yawe hemi talemaot Mesij blong hem long Jeremaea. Hemi tok olsem,

¹³ “Yu go long Profet Hananaea an tok olsem long hem, ‘Yawe hu hemi garem evri paoa, an hu hemi God blong Israel, hemi tok olsem: Yu brekem nomoa disfala pis timba wetem strap. Bat fo sensim baek, bae mi wakem sem kaen samting long aean nao, an putum long yu.

¹⁴ Bae mi putum pipol blong olketa kantri ya andanit long bikfala paoa blong King Nebukadnesa blong Babilonia wea no eniwan save brekem. An bae mi mekem tu olketa wael animol fo stap andanit long paoa blong hem.’”

¹⁵ Den Profet Jeremaea hemi tok olsem long Profet Hananaea, “!Hananaea! !Lisin kam! !Yawe hemi no sendem yu ya! An yu gohed fo mekem olketa pipol fo bilivim laea toktok blong yu.

¹⁶ Dastawe nao Yawe, hemi tok olsem: No longtaem, bae mi aotem yu from disfala wol. Bifoa wanfala yia hemi finis, bae yu dae, bikos yu gohed fo talemaot long olketa pipol wea olketa mas agensim mi Yawe.”

¹⁷ Nao long mekseven mans long sem yia ya nomoa, Profet Hananaea hemi dae.