Jenesis 11 - Pijin Deuterocanon

Long Babilon, olketa man wakem wanfala haos wea i barava hae fogud

¹ Long barava bifoa kam, olketa pipol long olketa ples long wol olketa garem wanfala langguis nomoa, an olketa gohed fo yusim sem toktok nomoa.

² Nao taem olketa muv go from saet long ist, olketa faendem wanfala flat ples long kantri long Sinaa. Nao olketa mekem taon blong olketa long disfala ples.

³ Nao olketa tok olsem, “!Olketa! Yumi tekem samfala graon, an wakem olketa brik long hem, an hotem long faea fo mekem olketa strong.” Taem olketa duim olsem, olketa garem plande brik fo yusim olsem ston fo wakem haos, an olketa garem ta fo joenem olketa.

⁴ Nao olketa tok olsem, “Hemi gud fo yumi wakem wanfala taon blong yumi wea bae hemi garem wanfala haos long hem wea i barava hae tumas go-go hemi kasem long skae. From diswan bae yumi garem biknem, an bae yumi no stap seleva olobaot long evri ples long wol, bat bae yumi save stap tugeta nomoa.” So olketa gohed fo wakem taon wetem haos ya nao.

⁵ Nao Yawe hemi kamdaon fo lukim olketa waka ya blong olketa,

⁶ an hemi tok olsem, “!Maewat! Olketa pipol ya i pipol blong wanfala ples nomoa, an olketa gohed fo yusim wanfala langguis tu. Disfala haos olketa jes wakem, hemi fas waka blong olketa nomoa ya. Bae no longtaem, olketa save mekem enisamting wea olketa laekem nomoa ya.

⁷ Moabeta yumi godaon fo miksimap langguis blong olketa, mekem olketa no save fo heresave long toktok blong olketa narawan.”

⁸ Nao Yawe hemi mekem olketa fo lusim ples ya, an mekem olketa fo go stap olobaot long evri ples long wol, an olketa no wakem taon ya moa.

⁹ Nem blong taon ya nao Babilon, bikos long ples ya, Yawe hemi miksimap langguis blong olketa pipol long wol, an long ples ya, hemi ranemaot olketa pipol mekem olketa go stap olobaot long evri ples long wol.

Olketa wea i bon kam long laen blong Siem

¹⁰ Stori abaotem laen blong Siem hemi olsem: Hem ya nao olketa wea i bon kam long laen blong oloman Siem hemi olsem. Long taem wea bikfala wata hemi finis, Siem hemi kasem 98 yia, an tu yia moa bihaen hemi bonem Afaksad.

¹¹ Nao Siem hemi stap 500 yia moa, an hemi gohed fo bonem olketa narafala pikinini moa, samfala wea i boe an samfala wea i gele.

¹² Taem Afaksad hemi kasem 35 yia hemi bonem Sela.

¹³ Nao Afaksad hemi stap 403 yia moa, an hemi gohed fo bonem olketa narafala pikinini moa, samfala wea i boe an samfala wea i gele.

¹⁴ Taem Sela hemi kasem 30 yia hemi bonem Eba.

¹⁵ Nao Sela hemi stap 403 yia moa, an hemi gohed fo bonem olketa narafala pikinini moa, samfala wea i boe an samfala wea i gele.

¹⁶ Taem Eba hemi kasem 34 yia hemi bonem Pileg.

¹⁷ Nao Eba hemi stap 430 yia moa, an hemi gohed fo bonem olketa narafala pikinini moa, samfala wea i boe an samfala wea i gele.

¹⁸ Taem Pileg hemi kasem 30 yia hemi bonem Riu.

¹⁹ Nao Pileg hemi stap 209 yia moa, an hemi gohed fo bonem olketa narafala pikinini moa, samfala wea i boe an samfala wea i gele.

²⁰ Taem Riu hemi kasem 32 yia hemi bonem Serug.

²¹ Nao Riu hemi stap 207 yia moa, an hemi gohed fo bonem olketa narafala pikinini moa, samfala wea i boe an samfala wea i gele.

²² Taem Serug hemi kasem 30 yia hemi bonem Nehoa.

²³ Nao Serug hemi stap 200 yia moa, an hemi gohed fo bonem olketa narafala pikinini moa, samfala wea i boe an samfala wea i gele.

²⁴ Taem Nehoa hemi kasem 29 yia hemi bonem Tera.

²⁵ Nao Nehoa hemi stap 119 yia moa, an hemi gohed fo bonem olketa narafala pikinini moa, samfala wea i boe an samfala wea i gele.

²⁶ An Tera hemi kasem 70 yia, nao hemi bonem Ebram, an Nehoa, an Haran.

Olketa wea i bon kam long laen blong Tera

^27-29 Stori abaotem laen blong Tera hemi olsem: Hem ya nao olketa wea i bon kam long laen blong oloman Tera hemi olsem. Olketa pikinini boe blong hem nao, hemi Ebram, an Nehoa, an Haran. An olketa pikinini blong Haran nao, hemi Lot, an Milka, an Iska. Nao Haran hemi dae long taon long Ur, long Kaldia, bat dadi blong hem hemi laef yet. Nao Ebram hemi maritim wanfala gele, nem blong hem Sarae, an Nehoa hemi maritim Milka, dota blong brata blong hem.

³⁰ Nao Sarae hemi no garem pikinini, bikos hemi no save babule.

³¹ Nao Tera hemi tekem pikinini blong hem Ebram wetem Sarae wea i waef blong Ebram, an hemi tekem smolfala grani blong hem Lot wea dadi blong hem nao Haran. Nao olketa goaot long taon ya wea olketa kolem Ur long Kaldia, mekem olketa go long kantri wea olketa kolem Kenan. Bat taem olketa kasem wanfala ples wea olketa kolem Haran, olketa mekem hom blong olketa long hem nao.

³² Tera hemi dae long ples ya nao taem hemi kasem 205 yia.