Aesaea 46 - Pijin Deuterocanon

¹ “Hem ya nao en blong tufala kaving god ya Bel an Nebo, wea olketa pipol blong Babilon i wosipim. Tufala god ya, olketa dongki nao i karim tufala. Tufala god ya i barava hevi fogud, an mekem olketa dongki ya i taet fogud tu.

² Tufala god ya i nating garem eni paoa fo sevem tufala seleva. Olketa enemi i holem tufala finis an karim go nao. Hem nao en blong tufala kaving god ya blong Babilon.

³ “!Lisin kam long mi, yufala hu i stap yet long laen blong Israel! Stat kam long bifoa yet, long taem wea yufala bon kam long hem, mi nao mi lukaftarem yufala.

⁴ Ya, bae mi nao mi gohed fo lukaftarem yufala, go-go hea blong yufala hemi kamap waet. Mi nao mi mekem yufala, an bae mi lukaftarem yufala. Bae mi helpem yufala an sevem yufala tu.

⁵ “?Yufala tingse mi semsem wetem hu ya? ?Waswe, eni narafala god moa hemi olsem mi? !Barava nomoa nao!

⁶ Olketa pipol i openem paos blong olketa, an kapsaetem olketa gol o silva fo skelem olketa. Nao olketa peim wanfala man mekem hemi wakem gol an silva long wanfala kaving god long hem. Bihaen, olketa baodaon long hem, an wosipim hem.

⁷ Olketa karim kaving god ya antap long solda blong olketa. Olketa stanemap long wanfala ples, an hemi stanap olowe long ples ya nao, bikos hemi no save muv seleva. An nomata eniwan hemi prea long god ya, bat hemi no save herem hem, an hemi no save helpem hem long taem blong trabol.

⁸ “!Tingim diswan, yufala pipol hu i agensim mi! !Yufala mas no fogetem olketa samting ya wea mi bin duim!

⁹ Yufala mas tingim olketa samting wea hemi hapen kam bifoa. An yufala mas save dat mi nomoa mi God, an no eni narafala god moa hemi stap olsem mi.

¹⁰ Longtaem bifoa yet, mi talemaot finis olketa samting wea hemi hapen. Longtaem bifoa, mi talemaot finis olketa samting wea bae hemi hapen bihaen. Mi talem finis dat olketa plan blong mi bae hemi kam tru, an bae mi duim evrisamting wea mi laekem.

¹¹ Bae mi kolem kam wanfala man from farawe long saet long ist, an bae hemi kam kuiktaem olsem wanfala igol wea hemi daeva kuiktaem kamdaon from skae fo kilim dae kaikai blong hem. Bae man ya hemi duim evrisamting wea mi bin planem. Mi talemaot finis, an bae mi duim olketa samting ya olsem wea mi bin talem.

¹² “!Lisin kam long mi, yufala pipol hu i bikhed tumas! Yufala farawe tumas nao from stretfala wei blong mi.

¹³ Distaem, stretfala wei blong mi hemi barava kam kolsap nao. No enisamting save stopem nao. Bae mi sevem Jerusalem, an bae mi liftimap nem blong olketa pipol blong mi long Israel.”