Aesaea 39 - Pijin Deuterocanon

Samfala pipol blong Babilon i kam long Jerusalem

¹ Long datfala taem, King Merodak-Baladan, san blong Baladan, hemi king long Babilon. King ya hemi herem dat King Hesekaea bin sik, bat hemi gudbaek moa. So hemi sendem samfala pipol blong hem wetem samfala leta an wanfala presen fo givim long King Hesekaea.

² King Hesekaea hemi hapi tumas fo lukim olketa pipol ya, an hemi som olketa evri gudfala samting wea hemi garem. Hemi tekem olketa fo lukim olketa silva an gol blong hem, an olketa lif fo putum long kaikai mekem hemi smel gud, an olketa nambawan oel, an evri wepon blong hem. Olketa lukim evrisamting wea hemi stap long haos blong hem an lukim tu evrisamting wea hemi stap insaet long kingdom blong hem.

³ Bihaen, Profet Aesaea hemi kam long Hesekaea an askem hem olsem, “King. ?Olketa pipol long wea nao ya? ?An wanem nao olketa talem long yu?” King hemi tok olsem, “Olketa kam farawe tumas. Olketa kam from Babilon.”

⁴ An profet hemi askem hem moa olsem, “?Bat wanem nao olketa lukim insaet long haos blong yu?” King hemi tok olsem, “Evrisamting nao. No enisamting nao hemi stap wea mi no som long olketa yet.”

⁵ So profet hemi tok olsem long hem, “Oraet. Lisin kam long Mesij blong Yawe hu hemi garem evri paoa. Hemi tok olsem:

⁶ Hesekaea. Bae hemi kasem taem wea evrisamting insaet long haos blong yu, wetem evrisamting wea olketa grani blong yu bifoa i bin kipim ka-kam kasem tude, bae olketa pipol blong Babilon i kam an tekem go long ples blong olketa. An bae no enisamting nao hemi stap.

⁷ Bae olketa tekem samfala long olketa pikinini wea bae i bon kam long laen blong yu, fo kamap wakaman insaet long haos blong king long Babilon.”

⁸ Bat king hemi tingse toktok ya hemi minim wea bae hemi save stap gudfala olowe long laef blong hem, so hemi tok olsem, “Disfala Mesij wea Yawe hemi talem long yu, hemi gud nomoa.”