Aesaea 24 - Pijin Deuterocanon

Bae Yawe hemi panisim disfala wol

¹ (Profet) !Olketa! Bae Yawe hemi spoelem disfala wol, an no enisamting nao bae hemi stap long hem. Bae hemi brekem graon ya olsem taem blong etkuek, an bae hemi mekem olketa pipol fo go olobaot nomoa long olketa deferen ples long wol.

² Hem nao bae evriwan mas safa. Nomata prist o man nomoa, tufala mas safa long sem wei. Nomata masta o wakaman, tufala mas safa long sem wei. Nomata metron o haosgele, tufala mas safa long sem wei. Nomata man fo maket o man fo pei, tufala mas safa long sem wei. Nomata man fo askem kaon o man hu hemi givim kaon, tufala mas safa long sem wei. Nomata risman o puaman, tufala mas safa long sem wei.

³ Ya, disfala wol bae hemi kamap barava nogud tumas, an bae no enisamting nao hemi stap long hem. Yawe nao hemi talem diswan, an bae hemi mas hapen.

⁴ (Profet) Evriwea long wol bae graon hemi kamap barava drae, an evrisamting bae hemi grou wik an dae. Evri bikman long wol bae hemi kamap wik tumas.

⁵ Olketa pipol long wol i mekem disfala wol fo kamap ravis long ae blong Yawe, bikos olketa gohed fo brekem lo blong wol ya an strongfala agrimen wea hemi stap olowe.

⁶ From diswan nao, bae bikfala trabol hemi kasem disfala wol. An olketa pipol long wol mas safa fo evri rong blong olketa, an no plande long olketa nao bae i stap long wol ya.

⁷ Olketa grep tri bae i kamap drae, an no eni waen nao bae hemi stap. Olketa pipol hu i gohed fo hapi bifoa, distaem olketa filnogud tumas nao.

⁸ An olketa pipol hu bin gohed fo ringim gita an tamborin an gohed fo singsing bifoa, distaem olketa stap kuaet nao.

⁹ Hem nao mi nating lukim eni man hemi dringim waen an singsing olsem bifoa. An taem olketa dringim bia, hemi saoa tumas long olketa nao.

¹⁰ Long taon ya, evrisamting hemi olobaot nao. An evriwan i lokem olketa seleva insaet long olketa haos fo haed.

¹¹ Olketa pipol i go evriwea long taon ya, an singaot falom olketa rod fo waen, bikos disfala hapi taem blong olketa bifoa, hemi barava finis nao.

¹² Olketa haos i brek olobaot nao, an olketa geit long bikfala wolston blong taon ya i kamap nogud tumas.

¹³ Disfala semsamting bae hemi kasem olketa kantri evriwea long wol. An wol ya bae hemi olsem plantesin blong oliv tri wea olketa pipol i finisim evri frut from antap long tri ya. Bae hemi olsem tu plantesin blong grep tri wea olketa tekemaot finis evri gudfala frut long hem, an lusim nomoa samfala fo olketa pua pipol.

¹⁴ Bihaen long datfala taem, olketa hu i laef yet bae i hapi an singsing. An olketa long saet long west bae i gohed fo talemaot olsem Yawe nao hemi King an hemi hae fogud.

¹⁵ An olketa long saet long ist bae i gohed fo onarem hem. An olketa wea i stap long daon long solwata bae i gohed fo preisim nem blong Yawe, God blong Israel.

¹⁶ Bae yumi herem olketa pipol long farawe kantri narasaet long wol i singsing fo preisim God hu hemi stret olowe. Bat mi tok olsem, “!Man! !Mi dae finis nao! !An bodi blong mi hemi bon nating tu! Olketa fren blong mi i laea nomoa long mi, an letem mi go long han blong olketa enemi blong mi. Oltaem, wei blong olketa fo laea, hemi kamap wos fogud.”

¹⁷ !Olketa pipol long wol! !Yufala lisin kam long mi! Olketa trap wetem plande samting fo mekem yufala fraet hemi stap frant long yufala nao.

¹⁸ Pipol wea i laek fo ranawe from olketa samting ya fo fraet long hem, bae i foldaon long hol. An pipol wea i laek fo ranawe from trap ya, bae i fas long hem. An bae bikfala ren hemi kamdaon, an botom blong disfala graon bae hemi seksek tumas.

¹⁹ Bae graon ya hemi seksek go-go hemi brek, an bae hemi garem bikfala hol long hem.

²⁰ Wol ya bae hemi rol olobaot, olsem wanfala drang man wea hemi no save wakabaot stret. Wol ya bae hemi seksek olsem lif haos wea hemi seksek taem saekloun hemi kasem. Olketa sin blong olketa pipol long disfala wol hemi olsem wanfala hevi samting long baeksaet blong olketa. An bae hemi mekem olketa foldaon an no save getap moa.

²¹ Long datfala taem, bae Yawe hemi panisim olketa hu i garem paoa long antap an olketa hu i rul ovarem disfala wol.

²² Bae hemi putum olketa tugeta insaet long wanfala barava dip hol, olsem olketa pipol hu i stap long prisin. An bae hemi kipim olketa long ples ya go-go kasem taem wea bae hemi panisim olketa.

²³ Long datfala taem tu, san an mun bae i no saen moa, bikos Yawe hu hemi garem evri paoa hemi rul olsem king. Bae hemi rul ovarem Jerusalem antap long Tambu Maonten long Saeon, an olketa lida blong yumi bae i lukim saen long bikfala paoa blong hem.