Aesaea 20 - Pijin Deuterocanon

Olketa hu i mekhae long Ijip an Kus bae i filsem

¹ (Profet) King Sagon blong Asiria, hemi talem bikfala sif blong ami blong hem fo go faetem pipol blong Asdod wea hemi wanfala bikfala taon long Filistia.

² Bat taem disfala samting hemi no hapen yet, Yawe hemi tok olsem long mi, Aesaea, san blong Amoj, “Yu mas tekemaot ravis kaleko wea yu werem ya wetem sandol blong yu fo som dat yu sore tumas, an yu mas wakabaot neket nomoa.” So mi duim nao wanem Yawe bin talem long mi.

³ Taem olketa soldia blong Asiria i winim taon long Asdod, mi talemaot toktok blong Yawe olsem, “!Olketa! !Yufala lukim! Fo trifala yia nao, wakaman blong mi Aesaea hemi gohed fo wakabaot neket nomoa an hemi no werem eni sandol. Diswan hemi wanfala saen fo somaot olketa samting wea bae hemi kasem olketa pipol blong Ijip an Kus.

⁴ Taem king blong Asiria hemi winim tufala kantri ya, bae hemi holem olketa pipol an lidim olketa goaot neket. Nomata olketa yanga o olketa olo, bae evriwan i wakabaot neket an barava filsem fogud.

⁵ Evri pipol hu i dipen nomoa long olketa blong Kus an olketa blong Ijip fo helpem olketa, bae olketa tu i barava fraet an filsem fogud.

⁶ Long taem ya olketa pipol hu i stap long saetsi blong Filistia, bae i tok olsem, ‘!Yufala lukim! Yumi gohed fo dipen long olketa fo helpem yumi, an yumi save ran go long olketa fo sevem yumi from ami blong disfala king long Asiria, bat olketa winim finis Ijip an Kus. ?Hao nao bae yumi save ranawe from disfala ami?’ ”