Aesaea 17 - Pijin Deuterocanon

Bae Yawe hemi panisim olketa blong Siria an olketa blong Israel

¹ Hem ya profesi abaotem Siria. Yawe nao hemi tok olsem, “Nomata Damaskas hemi wanfala bikfala taon, bat bae hemi kamap wanfala bikfala hip ravis nomoa.

² An taon ya long Aroa wetem evri ples raonem, bae hemi emti finis. Bae olketa sipsip an nanigot nomoa i gohed fo kaikai olobaot long olketa taon ya, an bae no eniwan hemi stap fo mekem olketa fraet.

³ Long Israel, evri taon wea hemi garem bikfala wolston bae hemi brekdaon finis. An long Damaskas wea hemi kapitol blong Siria, rul blong king bae hemi finis tu. Smolfala haf long olketa pipol blong Siria hu i laef yet, wanem hemi bin hapen long disfala bikfala nem blong olketa pipol blong Israel, bae hemi hapen long olketa tu.” Hem nao mesij blong Yawe hu hemi garem evri paoa.

⁴ An Yawe hemi tok moa olsem, “Long datfala taem, disfala biknem blong Israel bae hemi kamap samting nating nomoa, olsem wanfala fat man hu hemi sik tumas an hemi kamap bon nating nao.

⁵ Long taem ya, bae Yawe hemi aotem finis olketa pipol olsem wea man hemi go aotem evri kaikai long gaden blong hem. Bae hemi olsem olketa gaden blong yufala long gudfala graon long vali long Refaem, wea yufala go aotem kam nao evri kaikai wea hemi stap long hem.

⁶ Ya, bae no plande pipol i laef long disfala kantri. Bae hemi olsem wanfala oliv tri wea olketa pipol i aotem kolsap evri frut from hem, an tu-tri frut nomoa hemi stap long brans long antap an tu-tri long brans long daon.” Hem nao mesij blong Yawe, God blong Israel.

⁷ (Profet) Long datfala taem, bae olketa pipol jes luk go long God hu hemi mekem olketa, an bae olketa jes luksave nao long Holi God blong Israel.

⁸ Bae olketa no trastem moa olketa samting wea olketa seleva i wakem long han blong olketa. An bae olketa no tingim moa olketa olta wea olketa wakem, an olketa kaving long woman god ya Asera, wetem olketa olta fo bonem insens long hem.

⁹ Long datfala taem tu, olketa strongfala taon blong olketa bae i emti, olsem bifoa, taem wea olketa pipol bin ranawe from olketa blong Israel. Ya, bae olketa taon ya i kamap nogud tumas olsem long bus wea no eniwan hemi stap long hem.

¹⁰ Olketa pipol blong Israel. Yufala fogetem nao God hu hemi sevem yufala, an hemi lukaftarem yufala, an hemi gadem yufala. God nao hemi strongfala Rok wea hemi sefples blong yufala. Bat yufala bin wakem olketa tambu gaden fo mekem wosip long olketa god blong olketa long narafala kantri.

¹¹ An sapos olketa gaden ya i grou, an karim flaoa long sem de ya wea yufala plantem, bae hemi nating garem eni kaikai long hem. Bae wanfala barava ravis sik an strongfala pein nomoa hemi kasem yufala.

Bae Yawe hemi spoelem evri narafala kantri wea i enemi long yumi

¹² (Profet) !Maekrangge! Olketa pipol blong olketa narafala kantri i olsem olketa bikfala wev wea hemi brek antap long rif long taem blong saekloun.

¹³ Bat nomata olketa ya i ran kam kuiktaem long yumi olsem bikfala solwata wea hemi brek kam long sanbis, taem Yawe hemi tok long olketa, bae olketa evriwan i taneraon an ranawe. Hemi ronemaot olketa an olketa i olsem wea olketa flae nomoa olsem asis long saet long hil, o olsem drae lif wea bikfala win hemi karim go.

¹⁴ Long naet, olketa mekem yumi fraet an seksek. Bat long moning, olketa lus finis nao. Hem nao wanem bae hemi hapen long olketa pipol hu i kam an spoelem ples blong yumi, an stilim tu evrisamting blong yumi.