Aesaea 15 - Pijin Deuterocanon

Bae Yawe hemi spoelem kantri blong Moab

¹ Hem ya profesi abaotem Moab. Yawe nao hemi tok olsem, “Long wanfala naet nomoa, tufala bikfala taon ya blong Moab, Ara an Kia, bae olketa spoelem finis.

² Olketa pipol long taon long Dibon i wakabaot go long ples fo wosip antap long hil fo sore an krae. Olketa pipol blong Moab i krae bikfala antap long maonten long Nebo an long taon long Medeba. Olketa resam hed an biad blong olketa bikos olketa barava sore fogud.

³ Hem nao falom olketa bikfala rod long taon ya, olketa pipol i werem nomoa olketa ravis kaleko, an olketa hipap long olketa ples long taon an gohed fo krae bikfala.

⁴ Long tufala taon long Hesbon an Eleale, olketa pipol i gohed fo krae bikfala. Olketa pipol wea i stap kam long olketa ples raonem tufala taon ya, go-go kasem taon long Jahas wea hemi stap farawe, olketa save herem kam bikfala noes long krae blong olketa. Nomata olketa soldia blong Moab, olketa fraet tumas an seksek fogud taem olketa herem bikfala krae ya.

⁵ “Bat mi barava sore tumas long olketa pipol blong Moab. Bikos samfala long olketa i ranawe go farawe long taon long Soa, an long taon long Eglat-Selisia. An samfala long olketa i gohed fo krae an falom rod wea hemi goap long taon long Luhit. An samfala long olketa tu i krae an ranawe go olowe long taon long Horonaem.

⁶ Riva ya Nimrim hemi draeap nao, an olketa gras long saet long hem hemi barava drae tu. Evriwea long kantri ya, no enisamting save grou long hem, bikos evrisamting ya hemi barava drae nao.

⁷ Samfala pipol i karim olketa gudfala samting blong olketa, an ranawe go akros long Wilo Riva fo goap long hil long narasaet.

⁸ Evriwea long kantri ya, olketa pipol save herem bikfala krae blong pipol long Moab. Nomata long taon long Eglaem long saot, an long taon long Beerelim long not, olketa save herem kam nomoa krae blong olketa ya.

⁹ Long bikfala taon long Dibon, riva hemi kamap red long blad blong pipol, bat plan blong mi nao fo spoelem moa olketa pipol ya. Olketa pipol blong Moab hu i laef yet, olketa trae fo ranawe from olketa trabol ya, bat bae mi kilim dae olketa evriwan olsem wea mi sendem wanfala laeon fo kaikaim olketa.”