2 Korin 5 - Pijin Deuterocanon

¹ Yumi save dat taem disfala bodi blong yumi long wol hemi dae, bae yumi go stap long niu bodi wea God bae hemi givim long yumi long heven. God nao hemi mekem disfala niu bodi, an diswan hemi save stap evritaem olowe nomoa.

² Distaem, yumi filnogud an barava laekem tumas fo stap long disfala niu bodi blong heven.

³ Bikos taem bae yumi stap long niu bodi finis, spirit blong yumi bae hemi no olsem man hemi neket.

⁴ Yumi stap yet long disfala bodi blong yumi long wol, an yumi karihevi an filnogud long hem. Bat yumi no laek fo lusim disfala bodi. Nomoa. Yumi laekem tumas disfala bodi blong heven fo kam kavarem yumi, mekem disfala niu bodi blong laef bae hemi sensim evrisamting blong dae.

⁵ God nao hemi mekem yumi redi fo yumi sens olsem, an hemi givim finis Holi Spirit long yumi fo somaot dat bae hemi barava hapen.

⁶ So yumi savegud dat taem yumi stap yet insaet long bodi long wol, yumi farawe from Masta.

⁷ Laef blong yumi hemi laef blong biliv, an hemi no laef blong olketa samting yumi save lukim.

⁸ Ya, yumi barava savegud dat hemi moabeta sapos yumi lusim go nomoa bodi blong yumi long wol ya, an go stap long barava ples blong yumi wetem Masta.

⁹ Bat bikfala samting moa hemi olsem, nomata watkaen bodi yumi stap long hem, yumi laek fo mekem Masta hemi hapi long evrisamting yumi duim.

¹⁰ Yumi save, yumi evriwan bae yumi go stanap long ae blong Kraes fo hemi jajem yumi. Bae hemi peim yumi evriwan, falom evrisamting yumi duim long laef blong yumi long disfala wol, nomata hemi gud o hemi nogud.

Waka fo mekem pipol kamap fren wetem God

¹¹ From diswan nao, mifala save hao fo tinghae long Masta, an dastawe nao mifala trae mekem olketa pipol biliv long toktok blong mifala. God hemi savegud long mifala finis, an mi tingse yufala tu i barava save finis long mifala.

¹² Mifala no trae fo haemapem mifala seleva moa, bat mifala laek fo som nomoa samting mifala bin duim, mekem yufala save praod long mifala. Olsem, yufala garem samting fo talem long olketa pipol hu i save tokpraod abaotem wanem man save lukim nomoa bat olketa no wari abaotem wei blong olketa.

¹³ Sapos mifala luk krangge, hemi bikos mifala wakahad fo God. Bat sapos mifala garem gudfala tingting, hemi bikos mifala wakahad fo helpem yufala.

¹⁴ Lav blong Kraes nao hemi mekem mifala fo gohed olsem. Kraes hemi wanfala nomoa hu hemi bin dae fo sensim yumi evriwan, dastawe mifala luksave dat yumi evriwan bin dae.

¹⁵ Kraes hemi dae fo helpem evriwan, mekem yumi evriwan hu i barava laef, yumi mas no gohed moa fo falom tingting blong yumi seleva. Nomoa. Yumi mas falom tingting blong Kraes hu hemi dae finis fo yumi an hemi laefbaek moa.

¹⁶ So distaem, mifala no jajem eniwan falom wei blong man long wol. Long bifoa, mifala bin jajem Kraes falom wei blong man, bat distaem mifala no duim olsem moa.

¹⁷ Taem eniwan hemi joen wetem Kraes, God hemi mekem hem niufala moa. Olketa olfala samting i go finis, an olketa niufala samting nao i kam.

¹⁸ Evrisamting ya nao God hemi duim long yumi. Hemi mekem yumi kambaek an frengud moa wetem hem long wanem Kraes hemi duim. An hemi givim mifala disfala waka fo mekem olketa nara pipol kambaek an frengud wetem God moa.

¹⁹ Mifala minim olsem, from waka blong Kraes, God hemi gohed fo mekem evri pipol long wol fo kambaek an frengud wetem hem, an hemi no tingim moa olketa sin blong olketa. An hemi givim mifala disfala waka fo talemaot hao hemi mekem pipol fo kambaek an frengud wetem hem moa.

²⁰ So mifala nao man fo talemaot toktok blong Kraes, an hemi olsem God seleva nao hemi yusim mifala fo kolem olketa pipol. Mifala talemaot toktok blong Kraes an ask strong long yufala olsem, “!Yufala mas letem God fo mekem yufala save kambaek an frengud wetem hem moa!”

²¹ Kraes hemi no garem eni sin. Bat fo helpem yumi, God hemi mekem Kraes nao fo karim sin blong yumi. Long wei ya nao, hemi mekem yumi hu i stap joen wetem Kraes fo kamap stret olsem God.