1 Jon 1 - Pijin Deuterocanon

Toktok Blong Laef

¹ Mifala raet abaotem disfala Toktok Blong Laef, hu hemi stap olowe stat kam bifoa. Mifala bin herem hem, an mifala barava lukim hem long ae blong mifala. Ya, mifala bin lukim hem an tasim bodi blong hem.

² Disfala Laef bin kam finis long disfala wol, an mifala bin lukim hem tru nao. So distaem, mifala raet go long yufala fo talem yufala abaotem disfala Laef wea hemi no save finis. Long bifoa, hemi bin stap wetem God Dadi blong yumi, bat distaem hemi somaot hem seleva long mifala. An mifala talemaot nao, dat olketa samting ya i tru tumas.

³ So wanem mifala barava lukim an barava herem, hem nao mifala talemaot long yufala ya. Long disfala wei nao, bae yufala save stapgud wetem mifala olsem wea mifala stapgud wetem God Dadi an tugeta wetem San blong hem Jisas Kraes.

⁴ So mifala raetem disfala leta long yufala, fo mekem yumi barava hapi.

God nao hemi laet

⁵ Disfala toktok wea mifala bin herem long San Blong God an wea mifala talemaot long yufala, hemi olsem, “God nao hemi laet, an no eni tudak hemi save stap long hem.”

⁶ So sapos yumi talem dat yumi stapgud wetem God, bat yumi gohed nomoa fo sin olsem man blong tudak, yumi laea nao ya an yumi nating falom nomoa tru toktok blong God.

⁷ Bat sapos yumi falom wei blong laet olsem God hemi long laet, bae yumi save stapgud tugeta olowe. An bae blad blong Jisas San Blong God, hemi mekem yumi barava klin from evri sin blong yumi.

⁸ An sapos yumi talem dat yumi no garem eni sin, yumi laea long yumi seleva, an no eni tru toktok hemi stap long yumi.

⁹ Bat sapos yumi talemaot olketa sin blong yumi long God, bae hemi duim wanem hemi promisim an wanem hemi stret. Bae hemi fogivim yumi an bae hemi mekem yumi barava klin from evri sin blong yumi.

¹⁰ Sapos yumi talem dat yumi nating garem eni sin, hemi olsem yumi talem dat God hemi nating tru, an yumi nating bilivim toktok blong hem.