Матвей 14 - Шэнэ Хэлсээн

Уһаар Арюудхагша Иоаннай ами таһалба

¹ Тэрэ үедэ Галилей можын Ирод захирагша Иисус тухай һураг дуулаад:

² «Энэ Уһаар арюудхагша Иоанн байна. Энэшни амидыраа, тиимэһээл гайхамшагта хэрэгүүдые бүтээнэ», – гэжэ албатандаа хэлэбэ.

³ Урдань Ирод Филипп дүүгэйнгээ Иродиада һамганһаа боложо Иоанные барижа хүлеэд, түрмэдэ хаахыень захирһан байгаа.

⁴ Юундэб гэхэдэ, Иоанн: «Ши Иродиадатай һууха ёһогүйш», – гэжэ Иродтэ хэлэһэн байгаа.

⁵ Ирод Иоанные алахаяа һанабашье, улад зонһоо айгаа, ушарынь гэхэдэ, улад зон Иоанные лүндэншэ гэжэ тоолодог байгаа.

⁶ Иродэй түрэһэн үдэрэй найрта Иродиадын басаганиинь айлшадай урда хатаржа, Иродтэ ехээр һайшаагдаба.

⁷ Тиимэһээ басаганай ямаршье эриһэн юумые үгэхэб гэжэ Ирод амалба.

⁸ Эхынгээ һургаһан ёһоор басаган: «Мүнөө эндэ Уһаар арюудхагша Иоаннай толгойе табаг дээрэ табяад намда үгэ!» – гэжэ хэлэбэ.

⁹ Тиихэдэнь Ирод хаан һанаата болобошье, бүхы айлшадай урда үгөө үгэһэн тула басаганай хүсэл дүүргэгты гэжэ захирба.

¹⁰ Тиимэһээ түрмэ соо Иоаннай толгойе таһа сабшаба.

¹¹ Тиигээд толгойень табаг дээрэ табяад, басаганда асараа, тэрэнь эхэдээ абаашажа үгөө.

¹² Иоаннай шабинарынь бэеыень абаашажа хүдөөлүүлээ бэлэй. Тиигээд энээн тухай Иисуста ошожо дуулгаа һэн.

Иисус таба мянган хүниие садхааба

¹³ Иисус Иоанн тухай дуулаад, байһан газарһаа гансаараа онгосоор тамаржа эзэгүй зэлүүд газарта ошобо. Энээн тухай улад зон дуулаад, тура хотонуудһаа гаража, хойноһоонь ябагаар ошобо.

¹⁴ Иисус онгосоһоо буухадаа олон зониие хараад, тэдэниие хайрлан, үбшэнтэнииень аргалжа эдэгээбэ.

¹⁵ Үдэшэ болоходо, Иисусай шабинарынь тэрээндэ ерэжэ: «Энэ эзэгүй газар байна, тиигээдшье орой болоо. Хүдөө тосхонуудта ошожо, эдихэ юумэ худалдажа абахыень улад зоноо табииш», – гэбэ.

¹⁶ Зүгөөр Иисус тэдэндэ: «Улад зоной ошоһоной хэрэггүй, таанад тэдэндэ эдихэ юумэ үгэгты», – гэжэ хэлэбэ.

¹⁷ Тиихэдэнь шабинарынь: «Бидэ оройдоол табахан монсогор хилээмэтэй, хоёр загаһатай байнабди», – гэжэ харюусаба.

¹⁸ «Тэдэнээ иишэнь намда абажа ерэгты», – гэжэ Иисус хэлэбэ.

¹⁹ Тэрэ улад зондо ногоон дээрэ һуухыень захирба. Тиигээд табан хилээмэ, хоёр загаһыень абажа, тэнгэри өөдэ шэртэн, Бурханда баяр баясхалан хүргэбэ. Удаань хилээмэ хухалжа, шабинартаа үгэбэ, тэдэнь улад зондо дам тарааба.

²⁰ Зон бүгэдөөрөө эдижэ садаба. Тиигэхэдэнь эдеэнэй үлөөдэһөөр арбан хоёр түрсүүгые дүүргэбэ.

²¹ Эхэнэрнүүдһээ, үхибүүдһээ гадна тэндэ табан мянга шахуу эрэшүүл эдеэлһэн байба.

Иисусай уһан дээгүүр ябаһан тухай

²² Тиигээд Иисус шабинараа онгосодо һуулгажа, түрүүндэнь далайн нүгөө бэедэ тамаржа ошохыень захирба. Харин өөрөө улад зоной таратар үлөө һэн.

²³ Зоноо тараагаад, Иисус хада өөдөө зальбархаяа гансаараа гараба. Үдэшэндөөшье тэрэ тэндэ гансаараа байгаа.

²⁴ Эгээл тэрэ үедэ шабинарайнь тамаржа байһан онгосо далайн тэгэндэ хүрөөд, урдаһаань һалхинай үлеэхэдэ, долгиндо сохюулжа байба.

²⁵ Үүр сайхын урдахана Иисус далайн уһан дээгүүр ябаад, шабинартаа ошоо һэн.

²⁶ Шабинарынь тэрэнэй уһан дээгүүр ябаһыень хараад, айн мэгдэжэ: «Энэ хии үзэгдэл байна», – гэжэ айһандаа хашхаралдаба.

²⁷ Зүгөөр Иисус тэдэнтэй дары дуугаралсан: «Зоригтой байгты. Энэ биб, бү айгты», – гэбэ.

²⁸ Пётр тэрээндэ: «Дээдын Эзэн аа, хэрбээ энэ үнэхөөрөө ши юм һаа, намайе уһан дээгүүр ябаад, шамда ерэхыемни захирыш», – гэбэ.

²⁹ Тиихэдэнь Иисус: «Ерэ», – гэбэ. Пётр онгосоһоо гараад, багшынгаа урдаһаа уһан дээгүүр ябаба.

³⁰ Теэд шанга һалхинай үлеэхые обёорходоо айгаад, уһанда шэнгэжэ эхилбэ. «Дээдын Эзэн! Намайе абарыш», – гэжэ тэрэ хашхарба.

³¹ Иисус тэрэ дороо гараа һарбайжа, Пётрые дүнгэн баряад: «Ямар бирагүй этигэл һүзэгтэйбши! Юундэ һэжэглэбэш?» – гэбэ.

³² Тэдэ хоёрой онгосодо һуухатайнь сасуу һалхин намдаба.

³³ Онгосодо байһан шабинарынь Иисуста мүргэжэ: «Ши үнэхөөрөөл Бурханай Хүбүүн байнаш», – гэбэ.

Иисус Геннисаредтэ үбшэнтэниие эдэгээбэ

³⁴ Иисус шабинартайгаа далай гаталжа, Геннисаредэй газарта хүрэжэ ерэбэ.

³⁵ Тэндэхи зон Иисусые таняад, бүхы оршон тойронхи газарта хүнүүдые эльгээжэ, хамаг үбшэнтэниие тэрээндэ асаржа байгаа.

³⁶ Хубсаһандатнай халташье хүрэхые зүбшөөгыт даа гэжэ тэдэ Иисусһаа гуйба. Тиигээд хубсаһандань хүрэһэн хүн бүхэн эдэгэбэ.